رەسەي ساياحاتشىلارى قازاقستان پوليتسەيلەرٸن "اقشا بوپسالادى" دەپ ايىپتاپ, جەلٸدە ٷلكەن مەسەلە كٶتەرگەن. قر ٸشكٸ ٸستەر مينيسترلٸگٸ تۋريستەردٸڭ ەلەۋمەتتٸك جەلٸدەگٸ ايىپتاۋلارىن بٸردەن نازارعا الدى. كٶپتٸڭ قىزۋ تالقىسىنا تٷسكەن بۇل ۆيدەو بٷگٸندەرٸ شەتەلدٸك بلوگەرلەردٸڭ پاراقشاسىنان جويىلعان, دەپ حابارلايدى Dalanews.kz.
رەسەيلٸك بلوگەرلەر لەرا مەن ۆوۆا بٷكٸل ەلەمدٸ ساياحاتتاپ, قىزىقتى كونتەنت تاراتادى. بٸرنەشە كٷن بۇرىن ولار Instagram-داعى ٶز پاراقشاسىندا لەرا قازاقستاندا تاس جول ٷستٸندە پوليتسەيلەر ٶزدەرٸنٸڭ قالتاسىن قاعا جازداعانىن ايتىپ, ۆيدەو جارييالادى. ونىڭ ايتۋىنشا, الدىمەن ولاردىڭ دوستارىنىڭ كٶلٸگٸن توقتاتقان. سٶيتٸپ ولاردى "تٷتٸككە ٷرلەۋگە" مەجبٷر ەتكەن, جٷرگٸزۋشٸ الكوگول تۇتىنباسا دا قۇرىلعىدا 0,17 پروميلل دەگەن تسيفر اتىپ شىققان.
"بٸردەن جٷرگٸزۋشٸ كۋەلٸگٸنەن ايىرماق بولدى. سودان كەيٸن, ەرينە, مەسەلە اقشاعا دا كەلٸپ جەتتٸ: 1,5 ملن تەڭگە...", - دەدٸ لەرا.
سودان كەيٸن سول تەرتٸپ ساقشىلارى بلوگەرلەردٸ توقتاتقان. بلوگەردٸڭ كٷيەۋٸنەن قۇجاتتارىن الىپ العان. بٸراق, لەرا ايتقانداي, ولار كامەرانى الىپ, بولىپ جاتقان وقيعانى تٷسٸرە باستايدى, اقىرىندا تۋريستەردٸ ٶز جٶنٸنە جٸبەرگەن.
"قازاقستان شىنىمەن دە تاماشا مەملەكەت, بٸراق شەت ەلدە ٶزٸندٸ اقشا تولى سٶمكە سەكٸلدٸ سەزٸنۋ جاعىمسىز ەكەن", – دەيدٸ بلوگەر. ايتقانداي, قازٸر بۇل جازبا ولاردىڭ پاراقشاسىنان جويىلعان.
بٷگٸن, قر ٸٸم بۇل جاعدايعا قاتىستى تٷسٸنٸكتەمە بەردٸ.
"اتالعان ۆيدەو پايدا بولا سالىسىمەن ٸٸم ٶكٸلدەرٸ جازبا اۆتورىنا حابارلاستى. تۋريست ۆەدومستۆو تاراپىنان اشىقتىق, قوناقجايلىلىق جەنە جەدەل ەرەكەتتٸڭ بولۋىنا بايلانىستى العىس بٸلدٸردٸ. پوليتسييا قىزمەتكەرلەرٸنٸڭ ٸس-ەرەكەتتەرٸ الماتى وبلىسى ەڭبەكشٸقازاق اۋدانىنىڭ اۋماعىندا جوسپارلى ٸس-شارالار شەڭبەرٸندە جول قاۋٸپسٸزدٸگٸن قامتاماسىز ەتۋمەن بايلانىستى بولدى", - دەپ حابارلادى ۆەدومستۆودان.
مينيسترلٸك ٶز قىزمەتكەرلەرٸنٸڭ كەز-كەلگەن زاڭسىز ەرەكەتتەرٸ قاتاڭ جەنە بٸردەن اۋىزداقتىلاتىنىن ناقتىلادى. دەگەنمەن مينيسترلٸك بلوگەرلەردٸڭ 1,5 ملن تەڭگە بوپسالاۋ تۋرالى مەلٸمدەمەسٸنە قاتىستى ەشتەڭە ايتپاعان.
