Belgili zańger Nursultan Orynbek eldegi alaiaqtyq qylmystarynyń naqty sany resmi kórsetkishterden birneshe ese kóp ekenin málimdedi. Onyń aitýynsha, quqyq qorǵaý organdary mundai isterdiń basym bóligin qylmystyq is retinde tirkemei, jábirlenýshilerdi azamattyq sotqa jiberedi. Bul týraly ol SadaqMedia YouTube arnasyna bergen suqbatynda aitty, dep habarlaidy Dalanews.kz.
“Búginde elimizde alaiaqtyq derekteri ýshyǵyp tur. Alaida politsiia bul bappen kóp isti tirkemeýge tyrysady. Biz qazir “alaiaqtyq kóbeidi” dep júrmiz, biraq shyndyǵynda ol odan da kóp. Mysaly, keshe Prezident alqa jiynynda “alaiaqtyq keń taralǵan” dep atap ótti. Eger resmi málimette 20 myń is tirkelse, shyn máninde onyń sany 40 myńǵa jetýi múmkin. Óitkeni kóp jaǵdaida adamdar aryz jazbaidy, is múlde tirkelmei qalady”, - deidi zańger.
Ol alaiaqtardyń áreketi kóbine “qaitaryp berem”, “erteń salam”, “bir-eki kún kúte tur” degen ýádelermen bastalatynyn atap ótti. Biraq politsiia buny alaiaqtyq emes, azamattyq mámile retinde qarap, isti qylmystyq tirkeýden bas tartady.
“Osyny mámile dep sanap, politsiia is qozǵamai, azamattyq sotqa jiberedi. Al azamattyq sotqa júginý ońai emes. Aldymen memlekettik baj salyǵyn tóleisiń – bul da shyǵyn. Odan soń aqshańdy óndirý – ekitalai. Sot eń kóbi onyń shotyna arest qoiady. Biraq ondai alaiaqtardyń atyna eshteńe tirkelmegen: úi de joq, múlik te joq. Aqyr sońynda jábirlenýshi adam ózi júgirip, ózi sharshap qalady. Ádilet ornamaidy”, — deidi Orynbek.
Zańgerdiń aitýynsha, alaiaqtar sotta da “berem” dep ýáde etedi, biraq ýádesimen jyldap júre beredi.
“Qazir tipti bireýdiń atyna Kaspi Gold ashyp, sonymen tairańdap júrgender kóp. Ar jaǵynda eshkim de, eshteńe de joq. Bul – júieli másele. Óitkeni quqyqtyq sana tómen. Alaiaqtyqty jaqyn nárse kóretinder bar. Ashy bolsa da shyndyq – qazir qazaq qazaqty aiamaidy. Bir-birin aldap, biriniń atynan nesie rásimdep, kún kórip júrgender jetkilikti”, — deidi ol.
Nursultan Orynbektiń sózinshe, alaiaqtardy áleýmettik jelide áshkereleý jetkiliksiz. Eń mańyzdysy halyqtyń sengishtigin azaitý.
“Aldanatyndar azaisa, aldaityndar da azaiady. Biraq bizde aldanatyndar áli de kóp. Sondyqtan alaiaqtyqtyń tamyryna balta shabý qiyn bolyp tur”, — dep túiindedi zańger.
Perizat Qairat isi
Eske salaiyq, elimizde alaiaqtyq babymen isti bolyp jatqandardyń qatary artyp keledi. Solardyń biri — Biz Birgemiz Qazaqstan qaiyrymdylyq qorynyń jetekshisi Perizat Qairat.
Ol sý tasqynynan zardap shekkenderge kómek kórsetý, Gaza sektoryndaǵy gýmanitarlyq missiialar jáne basqa da qaiyrymdylyq sharalarymen ainalysyp, qoǵamda bedelge ie boldy.
Alaida 2024 jyly 14 qarashada Qarjylyq monitoring agenttigi Perizat Qairat 1,5 milliardty jymqyrdy degen kúdikke ilingenin habarlady.
Sonymen qatar ol 2023 jyly qarashada Palestina turǵyndaryna gýmanitarlyq kómek kórsetý úshin qarajat jinap, onyń 200 millionyn qaltasyna basqan degen kúdikke ilindi. QMA dereginshe, 2023 jylǵy jeltoqsanda osy aqsha esebinen Perizat Qairat Sensata Plaza elitalyq kesheninen 49 million teńgege úsh bólmeli páter jáne 30 million teńgege Mercedes-Benz EQE 500 4 Matic jańa kóligin satyp alǵan.
2024 jyly 16 qarashada Astana qalasynyń tergeý soty Perizat Qairat 2 aiǵa qamaýǵa alynǵanyn habarlady.
Jaqynda qarjylyq monitoringi agenttigi Perizat Qairat pen onyń anasy Gaini Alashbaevaǵa qatysty alaiaqtyq jáne qylmystyq jolmen alynǵan aqsha men múlikti zańdastyrý faktileri boiynsha sotqa deiingi tergep-tekserýdi aiaqtady.
2025 jyly 19 naýryzda taraptar 109 tomnan turatyn qylmystyq is materialdarymen tanysýǵa kiristi.
Buǵan deiin habarlanǵandai, zalal somasy 3,5 mlrd teńgeni qurady.
Urlanǵan qarajatqa satyp alynǵan 865 mln teńge kólemindegi múlikke tyiym salyndy.
Al 9 shildede Astanada Perizat Qairat pen anasyna qatysty sot otyrysy bastaldy.
"Elge kómek" qorynyń jetekshisi Iliias Sárievtiń ustalýy
Sonymen qatar jýyrda tanymal qaiyrymdylyq qordyń jetekshisi Iliias Sariev ustalǵany týraly aqparat ta tarady.
"Elge kómek ber" qaiyrymdylyq qorynyń jetekshisi Iliias Sariev ustalǵanyn alǵashynda zańger Nursultan Orynbekov málimdedi. Onyń sózinshe, jurttan Sarievtiń ústine aryz túsken.
"Qazaq Robin Gýd Iliias Sariev alaiaqtyq baby boiynsha ustaldy. Almatydan osyndai habar keldi. Birneshe adamnan alaiaqtyq áreketi boiynsha aryz túsken edi. Qazir sol boiynsha ustalǵany belgili boldy. Aldanǵandar bolsa, Almaty IID-ne aryzdansańyzdar bolady", - dedi ol.
Artynsha Dalanews.kz Almaty Politsiia departamentine saýal joldap, resmi aqparat ta aldy.
"Almaly aýdandyq PB-na qarasty politsiia bólimi alaiaqtyq deregi boiynsha qylmystyq is qozǵady. Jan-jaqty jáne obektivti tergeýge baǵyttalǵan tergeý sharalary júrgizilip jatyr. Olardyń qorytyndysy boiynsha protsessýaldyq sheshim qabyldanady", - dep jazylǵan Almaty Politsiia departamentiniń buǵan deiingi jaýabynda.
Aita keteiik, buǵan deiin aitysker aqyn Balǵynbek Imashevtyń uly Daniiar Imashev pen ánshi Abai Begeidiń qyzy men kúieý balasy alaiaqtyq boiynsha kúdikke ilingen edi.
Imashevti tergeýge ne túrtki boldy?
Qajylyqqa usha almaǵan bir top týrist “Qazaq travel” kompaniiasyna shaǵymdanǵan. Al Daniiar Imashev atalǵan kompaniianyń atqarýshy direktory bolyp qyzmet atqarady.
Bairaqmedia-nyń dereginshe, búginde qasietti mekenge ushýy tiis bolǵan týrister Áýezov aýdandyq politsiia basqarmasynyń aldyna jinalyp, jaǵdaidy túsindirip berýdi talap etip jatyr. Sebebi “Qazaq travel” kompaniiasy ushýǵa bir kún qalǵanda olardyń eshqaida ushpaitynyn habarlaǵan.
“Toǵyzy kúni ushatyn reisimizden eshqandai adam ushpady. Tipti kompaniia halyqqa shyǵyp, úndeý de jasamady. Bilettiń baǵasy ósip ketti-aý, basqa da jaǵdai bolyp qaldy-aý degen eskertý bolmady. Bizge eshqandai dálel kórsetip turǵan joq. Bilet pen qonaqúi aqysy tólendi degen aqparat ta bolmady" , - dep málimdedi kompaniianyń klienti Medina Jarylǵapova Bairaqmedia-ǵa.
Qazirgi ýaqytta “Qazaq travel” kompaniiasynyń keńsesi jabylǵan. Mádina men Mekkege usha almaǵan 50-ge tarta adam politsiiaǵa shaǵym túsirgen. Osydan keiin politseiler alaiaqtyq deregi boiynsha qylmystyq is qozǵap, kúdikti retinde úsh adamdy tanyǵan. Olardyń arasynda Daniiar Imashev ta bar. Al jýrnalister onyń qajylyqtan qalý sebebin suraǵanymen, Daniiar Imashev búgin ún qatpady.
Al, týyndaǵan qiyndyqtardyń sebebin qajyqqa attanbaq bolǵan qazaqstandyqtarǵa Balǵynbek Imashev túsindirip bergen. Aitysker aqyn áýe biletteri men qonaqúi baǵalarynyń qymbattaǵanyn jáne munda alaiaqtyqtyń joqtyǵyn málimdegen.
“Kóp adam týrdy aktsiiamen, arzan baǵada satyp alǵan. Qazir baǵa qymbattap jatyr. Qymbat biletter alynýda. Ushaqtyń baǵasy men qonaqúidiń baǵasy ósti. Sondyqtan quryltaishylar óz qaltasynan qosymsha aqsha salyp, sizderdiń qyzmetterińizdi usynýǵa tyrysyp jatyr”, - dep túsindirdi Balǵynbek Imashev.
Alaida Ýmraǵa usha almaǵandar onyń aitqandaryna senbei, tólengen qarajatty qaitarýdy talap etýde. Olar “Qazaq travel” kompaniiasynyń basqa musylmandardy aldamaýyn tileidi.
