بەلگىلى زاڭگەر نۇرسۇلتان ورىنبەك ەلدەگى الاياقتىق قىلمىستارىنىڭ ناقتى سانى رەسمي كورسەتكىشتەردەن بىرنەشە ەسە كوپ ەكەنىن مالىمدەدى. ونىڭ ايتۋىنشا، قۇقىق قورعاۋ ورگاندارى مۇنداي ىستەردىڭ باسىم بولىگىن قىلمىستىق ءىس رەتىندە تىركەمەي، جابىرلەنۋشىلەردى ازاماتتىق سوتقا جىبەرەدى. بۇل تۋرالى ول SadaqMedia YouTube ارناسىنا بەرگەن سۇقباتىندا ايتتى، دەپ حابارلايدى Dalanews.kz.

“بۇگىندە ەلىمىزدە الاياقتىق دەرەكتەرى ۋشىعىپ تۇر. الايدا پوليسيا بۇل باپپەن كوپ ءىستى تىركەمەۋگە تىرىسادى. ءبىز ءقازىر “الاياقتىق كوبەيدى” دەپ ءجۇرمىز، ءبىراق شىندىعىندا ول ودان دا كوپ. مىسالى، كەشە پرەزيدەنت القا جيىنىندا “الاياقتىق كەڭ تارالعان” دەپ اتاپ ءوتتى. ەگەر رەسمي مالىمەتتە 20 مىڭ ءىس تىركەلسە، شىن مانىندە ونىڭ سانى 40 مىڭعا جەتۋى مۇمكىن. ويتكەنى كوپ جاعدايدا ادامدار ارىز جازبايدى، ءىس مۇلدە تىركەلمەي قالادى”، - دەيدى زاڭگەر.

ول الاياقتاردىڭ ارەكەتى كوبىنە “قايتارىپ بەرەم”، “ەرتەڭ سالام”، “بىر-ەكى كۇن كۇتە تۇر” دەگەن ۋادەلەرمەن باستالاتىنىن اتاپ ءوتتى. ءبىراق پوليسيا بۇنى الاياقتىق ەمەس، ازاماتتىق مامىلە رەتىندە قاراپ، ءىستى قىلمىستىق تىركەۋدەن باس تارتادى.

“وسىنى مامىلە دەپ ساناپ، پوليسيا ءىس قوزعاماي، ازاماتتىق سوتقا جىبەرەدى. ال ازاماتتىق سوتقا جۇگىنۋ وڭاي ەمەس. الدىمەن مەملەكەتتىك باج سالىعىن تولەيسىڭ – بۇل دا شىعىن. ودان سوڭ اقشاڭدى ءوندىرۋ – ەكىتالاي. سوت ەڭ كوبى ونىڭ شوتىنا ارەست قويادى. ءبىراق ونداي الاياقتاردىڭ اتىنا ەشتەڭە تىركەلمەگەن: ءۇي دە جوق، مۇلىك تە جوق. اقىر سوڭىندا جابىرلەنۋشى ادام ءوزى جۇگىرىپ، ءوزى شارشاپ قالادى. ادىلەت ورنامايدى”، — دەيدى ورىنبەك.

زاڭگەردىڭ ايتۋىنشا، الاياقتار سوتتا دا “بەرەم” دەپ ۋادە ەتەدى، ءبىراق ۋادەسىمەن جىلداپ جۇرە بەرەدى.

“ءقازىر ءتىپتى بىرەۋدىڭ اتىنا Kaspi Gold اشىپ، سونىمەن تايراڭداپ جۇرگەندەر كوپ. ار جاعىندا ەشكىم دە، ەشتەڭە دە جوق. بۇل – جۇيەلى ماسەلە. ويتكەنى قۇقىقتىق سانا تومەن. الاياقتىقتى جاقىن نارسە كورەتىندەر بار. اششى بولسا دا شىندىق – ءقازىر قازاق قازاقتى ايامايدى. ءبىر-بىرىن الداپ، ءبىرىنىڭ اتىنان نەسيە راسىمدەپ، كۇن كورىپ جۇرگەندەر جەتكىلىكتى”، — دەيدى ول.

نۇرسۇلتان ورىنبەكتىڭ سوزىنشە، الاياقتاردى الەۋمەتتىك جەلىدە اشكەرەلەۋ جەتكىلىكسىز. ەڭ ماڭىزدىسى حالىقتىڭ سەنگىشتىگىن ازايتۋ.

“الداناتىندار ازايسا، الدايتىندار دا ازايادى. ءبىراق بىزدە الداناتىندار ءالى دە كوپ. سوندىقتان الاياقتىقتىڭ تامىرىنا بالتا شابۋ قيىن بولىپ تۇر”، — دەپ تۇيىندەدى زاڭگەر.

پەريزات قايرات ءىسى

ەسكە سالايىق، ەلىمىزدە الاياقتىق بابىمەن ءىستى بولىپ جاتقانداردىڭ قاتارى ارتىپ كەلەدى. سولاردىڭ ءبىرى — Biz Birgemiz Qazaqstan قايىرىمدىلىق قورىنىڭ جەتەكشىسى پەريزات قايرات.

ول سۋ تاسقىنىنان زارداپ شەككەندەرگە كومەك كورسەتۋ، گازا سەكتورىنداعى گۋمانيتارلىق ميسسيالار جانە باسقا دا قايىرىمدىلىق شارالارىمەن اينالىسىپ، قوعامدا بەدەلگە يە بولدى.

الايدا 2024 جىلى 14 قاراشادا قارجىلىق مونيتورينگ اگەنتتىگى پەريزات قايرات 1،5 ميللياردتى جىمقىردى دەگەن كۇدىككە ىلىنگەنىن حابارلادى. 

سونىمەن قاتار ول 2023 جىلى قاراشادا پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناپ، ونىڭ 200 ميلليونىن قالتاسىنا باسقان دەگەن كۇدىككە ءىلىندى. قما دەرەگىنشە، 2023 جىلعى جەلتوقساندا وسى اقشا ەسەبىنەن پەريزات قايرات Sensata Plaza ەليتالىق كەشەنىنەن 49 ميلليون تەڭگەگە ءۇش بولمەلى پاتەر جانە 30 ميلليون تەڭگەگە Mercedes-Benz EQE 500 4 Matic جاڭا كولىگىن ساتىپ العان.

2024 جىلى 16 قاراشادا استانا قالاسىنىڭ تەرگەۋ سوتى پەريزات قايرات 2 ايعا قاماۋعا الىنعانىن حابارلادى.

جاقىندا قارجىلىق مونيتورينگى اگەنتتىگى پەريزات قايرات پەن ونىڭ اناسى گايني الاشبايەۆاعا قاتىستى الاياقتىق جانە قىلمىستىق جولمەن الىنعان اقشا مەن مۇلىكتى زاڭداستىرۋ فاكتىلەرى بويىنشا سوتقا دەيىنگى تەرگەپ-تەكسەرۋدى اياقتادى. 

2025 جىلى 19 ناۋرىزدا تاراپتار 109 تومنان تۇراتىن قىلمىستىق ءىس ماتەريالدارىمەن تانىسۋعا كىرىستى.

بۇعان دەيىن حابارلانعانداي، زالال سوماسى 3،5 ملرد تەڭگەنى قۇرادى.

ۇرلانعان قاراجاتقا ساتىپ الىنعان 865 ملن تەڭگە كولەمىندەگى مۇلىككە تىيىم سالىندى.

ال 9 شىلدەدە استانادا پەريزات قايرات پەن اناسىنا قاتىستى سوت وتىرىسى باستالدى.

"ەلگە كومەك" قورىنىڭ جەتەكشىسى ءىلياس سارييەۆتىڭ ۇستالۋى

سونىمەن قاتار جۋىردا تانىمال قايىرىمدىلىق قوردىڭ جەتەكشىسى ءىلياس سارييەۆ ۇستالعانى تۋرالى اقپارات تا تارادى.

"ەلگە كومەك بەر" قايىرىمدىلىق قورىنىڭ جەتەكشىسى ءىلياس سارييەۆ ۇستالعانىن العاشىندا زاڭگەر نۇرسۇلتان ورىنبەكوۆ مالىمدەدى. ونىڭ سوزىنشە، جۇرتتان سارييەۆتىڭ ۇستىنە ارىز تۇسكەن.

"قازاق روبين گۋد ءىلياس سارييەۆ الاياقتىق بابى بويىنشا ۇستالدى. الماتىدان وسىنداي حابار كەلدى. بىرنەشە ادامنان الاياقتىق ارەكەتى بويىنشا ارىز تۇسكەن ەدى. ءقازىر سول بويىنشا ۇستالعانى بەلگىلى بولدى. الدانعاندار بولسا، الماتى ىىد-نە ارىزدانساڭىزدار بولادى"، - دەدى ول.

ارتىنشا Dalanews.kz الماتى پوليسيا دەپارتامەنتىنە ساۋال جولداپ، رەسمي اقپارات تا الدى.

"المالى اۋداندىق پب-نا قاراستى پوليسيا ءبولىمى الاياقتىق دەرەگى بويىنشا قىلمىستىق ءىس قوزعادى. جان-جاقتى جانە وبەكتيۆتى تەرگەۋگە باعىتتالعان تەرگەۋ شارالارى جۇرگىزىلىپ جاتىر. ولاردىڭ قورىتىندىسى بويىنشا پروسەسسۋالدىق شەشىم قابىلدانادى"، - دەپ جازىلعان الماتى پوليسيا دەپارتامەنتىنىڭ بۇعان دەيىنگى جاۋابىندا.

ايتا كەتەيىك، بۇعان دەيىن ايتىسكەر اقىن بالعىنبەك يماشيەۆتىڭ ۇلى دانيار يماشيەۆ پەن ءانشى اباي بەگەيدىڭ قىزى مەن كۇيەۋ بالاسى الاياقتىق بويىنشا كۇدىككە ىلىنگەن ەدى.

يماشيەۆتى تەرگەۋگە نە تۇرتكى بولدى؟

قاجىلىققا ۇشا الماعان ءبىر توپ تۋريست “Qazaq travel” كومپانياسىنا شاعىمدانعان. ال دانيار يماشيەۆ اتالعان كومپانيانىڭ اتقارۋشى ديرەكتورى بولىپ قىزمەت اتقارادى.

Bairaqmedia-نىڭ دەرەگىنشە، بۇگىندە قاسيەتتى مەكەنگە ۇشۋى ءتيىس بولعان تۋريستەر اۋەزوۆ اۋداندىق پوليسيا باسقارماسىنىڭ الدىنا جينالىپ، جاعدايدى ءتۇسىندىرىپ بەرۋدى تالاپ ەتىپ جاتىر. سەبەبى “Qazaq travel” كومپانياسى ۇشۋعا ءبىر كۇن قالعاندا ولاردىڭ ەشقايدا ۇشپايتىنىن حابارلاعان.

“توعىزى كۇنى ۇشاتىن رەيسىمىزدەن ەشقانداي ادام ۇشپادى. ءتىپتى كومپانيا حالىققا شىعىپ، ۇندەۋ دە جاسامادى. بيلەتتىڭ باعاسى ءوسىپ كەتتى-اۋ، باسقا دا جاعداي بولىپ قالدى-اۋ دەگەن ەسكەرتۋ بولمادى. بىزگە ەشقانداي دالەل كورسەتىپ تۇرعان جوق. بيلەت پەن ءقوناقۇي اقىسى تولەندى دەگەن اقپارات تا بولمادى" ،  - دەپ مالىمدەدى كومپانيانىڭ كليەنتى مەدينا جارىلعاپوۆا Bairaqmedia-عا.

قازىرگى ۋاقىتتا “Qazaq travel” كومپانياسىنىڭ كەڭسەسى جابىلعان. ءمادينا مەن مەككەگە ۇشا الماعان 50-گە تارتا ادام پوليسياعا شاعىم تۇسىرگەن. وسىدان كەيىن پوليسەيلەر الاياقتىق دەرەگى بويىنشا قىلمىستىق ءىس قوزعاپ، كۇدىكتى رەتىندە ءۇش ادامدى تانىعان. ولاردىڭ اراسىندا دانيار يماشيەۆ تا بار. ال جۋرناليستەر ونىڭ قاجىلىقتان قالۋ سەبەبىن سۇراعانىمەن، دانيار يماشيەۆ بۇگىن ءۇن قاتپادى.

ال، تۋىنداعان قيىندىقتاردىڭ سەبەبىن  قاجىققا اتتانباق بولعان قازاقستاندىقتارعا بالعىنبەك يماشيەۆ ءتۇسىندىرىپ بەرگەن. ايتىسكەر اقىن اۋە بيلەتتەرى مەن ءقوناقۇي باعالارىنىڭ قىمباتتاعانىن جانە مۇندا الاياقتىقتىڭ جوقتىعىن مالىمدەگەن.

“كوپ ادام تۋردى اكسيامەن، ارزان باعادا ساتىپ العان. ءقازىر باعا قىمباتتاپ جاتىر. قىمبات بيلەتتەر الىنۋدا. ۇشاقتىڭ باعاسى مەن ءقوناقۇيدىڭ باعاسى ءوستى. سوندىقتان قۇرىلتايشىلار ءوز قالتاسىنان قوسىمشا اقشا سالىپ، سىزدەردىڭ قىزمەتتەرىڭىزدى ۇسىنۋعا تىرىسىپ جاتىر”، - دەپ ءتۇسىندىردى بالعىنبەك يماشيەۆ.

الايدا ۋمراعا ۇشا الماعاندار ونىڭ ايتقاندارىنا سەنبەي، تولەنگەن قاراجاتتى قايتارۋدى تالاپ ەتۋدە. ولار “Qazaq travel” كومپانياسىنىڭ باسقا مۇسىلمانداردى الداماۋىن تىلەيدى.