Jambyl oblysynyń turǵyny bes ailyq sábiiniń ólimine aýdandyq dárigerlerdi kinálap otyr. Aitýynsha, aq halattylar sábige durys diagnoz qoimai, ýaqytynda em jasamaǵan, dep habarlaidy Dalanews.kz 31-arnanyń "Informbiýro" jańalyqtar qyzmetine silteme jasap.
Nuráli esimdi sábi aýrýhanaǵa jedel bronhit diagnozymen jetkizilip, bes kún em qabyldaǵan. Anasy Ajar Turǵynbaevanyń aitýynsha, balasyna túrli ekpe salynsa da, dene qyzýy túspei, jaǵdaiy jaqsarmaǵan. Soǵan qaramastan, dárigerler anasy men balany úiine emdelýge jibergen.
"Balam jazylyp ketedi dep senip, kúttim. Bes kún aýrýhanada jattyq. Keiin jaǵdaiy jaqsarmaǵan soń qaita keldim. Al olar “bala saý kúiinde úiine shyǵarylǵan” dep jazyp qoiypty. Eger balam saý bolsa, reanimatsiiada nege jatty? Ne sebepti eskertpedińizder? Bir ai eki apta boiy ne kúttińizder? Dene qyzýy tússe, men nege Almatyǵa baramyn? Nege meni erterek jolǵa shyǵarmadyńyzdar? Nege balamen jibermei qoidyńyzdar?", – dep jylap suraidy qaiǵy jutqan ana.
Ajar Turǵynbaevanyń sózinshe, sábi aýdandyq aýrýhanada aiǵa jýyq jatyp, jaǵdaiy tipti nasharlai túsken. Denesi isip, ine salatyn jeri qalmaǵan kezde ǵana anasy balasyn Almatyǵa aparǵan. Alaida bul kezde Nurálige asqynǵan pnevmoniia diagnozy qoiylyp, kóp uzamai shetinep ketken. Anasy balasynyń ólimine Qordai aýdandyq dárigerlerin kinálaidy.
Eń soraqysy sábi óliminen keiin qozǵalǵan qylmystyq is tórt aidyń ishinde «qylmys quramy joq» degen sebeppen jabylyp ketken. Alaida Densaýlyq saqtaý basqarmasy júrgizgen ishki tekseris barysynda dárigerlerdiń salǵyrttyq jibergeni anyqtalǵan.
"Iá, bizdiń tarapymyzdan qatelik boldy. Bul – bizdiń jumysymyz, ony tiisti deńgeide atqarýymyz kerek edi. Ata-anamen durys túsindirý jumysy júrgizilmegen. Balaǵa qaýip tónse, aýrýhanaǵa qaita kelý kerek ekeni nemese ózge qalaǵa shyǵýdyń qaýiptiligi naqty aitylmaǵan. Osy sebepti biz bárimiz jaýapqa tartyldyq, – dedi Qordai aýdandyq aýrýhanasynyń bas dárigeri Aidyn Baibekov.
Náresteniń qazasynan keiin jeti meditsina qyzmetkeri jaýapqa tartylǵanymen, bar bolǵany eskertý jáne sógispen shektelgen. Anasy mundai jazany ádiletsiz dep esepteidi. Ol qylmystyq isti toqtatqan tergeýshiniń áreketine quqyqtyq baǵa berilip, istiń qaita qaralýyn talap etýde. Marqumnyń týystary prokýratýraǵa aryz túsirgen. Qazir atalǵan fakt boiynsha prokýrorlyq tekserý júrgizilmek.
