جامبىل وبلىسىنىڭ تۇرعىنى بەس ايلىق ءسابيىنىڭ ولىمىنە اۋداندىق دارىگەرلەردى كىنالاپ وتىر. ايتۋىنشا، اق حالاتتىلار سابيگە دۇرىس دياگنوز قويماي، ۋاقىتىندا ەم جاساماعان، دەپ حابارلايدى Dalanews.kz 31-ارنانىڭ "ينفورمبيۋرو" جاڭالىقتار قىزمەتىنە سىلتەمە جاساپ.
ءنۇرالى ەسىمدى ءسابي اۋرۋحاناعا جەدەل برونحيت دياگنوزىمەن جەتكىزىلىپ، بەس كۇن ەم قابىلداعان. اناسى اجار تۇرعىنبايەۆانىڭ ايتۋىنشا، بالاسىنا ءتۇرلى ەكپە سالىنسا دا، دەنە قىزۋى تۇسپەي، جاعدايى جاقسارماعان. سوعان قاراماستان، دارىگەرلەر اناسى مەن بالانى ۇيىنە ەمدەلۋگە جىبەرگەن.
"بالام جازىلىپ كەتەدى دەپ سەنىپ، كۇتتىم. بەس كۇن اۋرۋحانادا جاتتىق. كەيىن جاعدايى جاقسارماعان سوڭ قايتا كەلدىم. ال ولار “بالا ساۋ كۇيىندە ۇيىنە شىعارىلعان” دەپ جازىپ قويىپتى. ەگەر بالام ساۋ بولسا، رەانيماسيادا نەگە جاتتى؟ نە سەبەپتى ەسكەرتپەدىڭىزدەر؟ ءبىر اي ەكى اپتا بويى نە كۇتتىڭىزدەر؟ دەنە قىزۋى تۇسسە، مەن نەگە الماتىعا بارامىن؟ نەگە مەنى ەرتەرەك جولعا شىعارمادىڭىزدار؟ نەگە بالامەن جىبەرمەي قويدىڭىزدار؟"، – دەپ جىلاپ سۇرايدى قايعى جۇتقان انا.
اجار تۇرعىنبايەۆانىڭ سوزىنشە، ءسابي اۋداندىق اۋرۋحانادا ايعا جۋىق جاتىپ، جاعدايى ءتىپتى ناشارلاي تۇسكەن. دەنەسى ءىسىپ، ينە سالاتىن جەرى قالماعان كەزدە عانا اناسى بالاسىن الماتىعا اپارعان. الايدا بۇل كەزدە نۇرالىگە اسقىنعان پنيەۆمونيا دياگنوزى قويىلىپ، كوپ ۇزاماي شەتىنەپ كەتكەن. اناسى بالاسىنىڭ ولىمىنە قورداي اۋداندىق دارىگەرلەرىن كىنالايدى.
ەڭ سوراقىسى ءسابي ولىمىنەن كەيىن قوزعالعان قىلمىستىق ءىس ءتورت ايدىڭ ىشىندە «قىلمىس قۇرامى جوق» دەگەن سەبەپپەن جابىلىپ كەتكەن. الايدا دەنساۋلىق ساقتاۋ باسقارماسى جۇرگىزگەن ىشكى تەكسەرىس بارىسىندا دارىگەرلەردىڭ سالعىرتتىق جىبەرگەنى انىقتالعان.
"ءيا، ءبىزدىڭ تاراپىمىزدان قاتەلىك بولدى. بۇل – ءبىزدىڭ جۇمىسىمىز، ونى ءتيىستى دەڭگەيدە اتقارۋىمىز كەرەك ەدى. اتا-انامەن دۇرىس ءتۇسىندىرۋ جۇمىسى جۇرگىزىلمەگەن. بالاعا ءقاۋىپ تونسە، اۋرۋحاناعا قايتا كەلۋ كەرەك ەكەنى نەمەسە وزگە قالاعا شىعۋدىڭ قاۋىپتىلىگى ناقتى ايتىلماعان. وسى سەبەپتى ءبىز ءبارىمىز جاۋاپقا تارتىلدىق، – دەدى قورداي اۋداندىق اۋرۋحاناسىنىڭ باس دارىگەرى ايدىن بايبەكوۆ.
نارەستەنىڭ قازاسىنان كەيىن جەتى مەديسينا قىزمەتكەرى جاۋاپقا تارتىلعانىمەن، بار بولعانى ەسكەرتۋ جانە سوگىسپەن شەكتەلگەن. اناسى مۇنداي جازانى ادىلەتسىز دەپ ەسەپتەيدى. ول قىلمىستىق ءىستى توقتاتقان تەرگەۋشىنىڭ ارەكەتىنە قۇقىقتىق باعا بەرىلىپ، ءىستىڭ قايتا قارالۋىن تالاپ ەتۋدە. مارقۇمنىڭ تۋىستارى پروكۋراتۋراعا ارىز تۇسىرگەن. ءقازىر اتالعان فاكت بويىنشا پروكۋرورلىق تەكسەرۋ جۇرگىزىلمەك.
