Túrkistan oblysynda egin sharýashylyǵymen ainalysatyn fermerler jeke kompaniianyń kesirinen shyǵynǵa ushyraǵandaryn aityp, shaǵymdandy. Olardyń sózinshe, qurylys kompaniiasy maqta men jońyshqa egilgen alqapty qazyp tastaǵan, dep habarlaidy Dalanews.kz 31 arnaǵa silteme jasap.
Kompaniia ókilderi jer astynda 40 jyl buryn tartylǵan qubyrdy qazyp almaq bolyp, egis alqabyn túgel búldirgen.
"Bes jarym gektar jerdiń jońyshqasy túgel qoparyldy. Endi ekinshi, úshinshi, tórtinshi orymnan eshqandai ónim ala almai qaldym", – deidi fermer Maira Shetenova.
Sharýalardyń aitýynsha, atalǵan kompaniianyń áreketi ondaǵan fermerge ziianyn tigizýi múmkin. Sebebi qazylyp jatqan qubyr egistikke sý beretin kanaldyń astynan ótedi. Eger jumys jalǵasa berse, egin sýsyz qalyp, túgel qýrap ketýi yqtimal.
Al jergilikti ákimdik ókilderi máseleni sheshýge sharasyz ekenin moiyndap otyr.
"Jaqynda turǵyndar "Ferrum Vtor" JShS ókilderimen kelisimge keldi. Qazir qazylǵan bóligin jaýyp, qalǵan jerdi kúzde qazýǵa ýaǵdalasty. Keiin búlingen alqapty qalpyna keltirýge kómektesemiz. Biraq sottyń sheshimin ózgertýge nemese oǵan qarsy shyǵýǵa quqymyz joq", – dedi Qosseiit aýyldyq okrýginiń ákimi Nurbol Jainarov.
Kompaniia basshylyǵy ázirge jaýap bermedi. Al sharýalar egistik alqaptaryn kúni-túni kúzetýge kiristi.
