Astanada qala ákimi Jeńis Qasymbektiń, Indýstriia jáne qurylys ministri Ersaiyn Naǵaspaevtyń, óńirlik ákimdikter men ýrbanistika salasyndaǵy halyqaralyq sarapshylardyń qatysýymen seminar-kezdesý ótti. Jiynda elordanyń áleýmettik-ekonomikalyq damý nátijeleri saralanyp, 2035 jylǵa deiingi negizgi damý baǵyttary belgilendi,- dep habarlaidy Dalanews.kz
Is-shara Memleket basshysynyń tapsyrmasy men «Taza Qazaqstan» atty iri ekologiialyq bastama aiasynda uiymdastyryldy.
Qala ákimi Jeńis Qasymbektiń aitýynsha, Astana turǵyndarynyń sany 1,5 million adamǵa jetip, jyl saiyn shamamen 7 paiyzǵa ósip keledi. Osyǵan orai qalanyń jańa Bas jospary qabyldandy. Onda halyq sany 2,3-2,5 million adamǵa deiin artady dep boljanǵan. Sondai-aq, eski turǵyn úilerdi jańartý baǵdarlamasy talqylandy. 2030 jylǵa deiin 206 apatty úidiń turǵyndary jańa baspanaǵa kóshiriledi. Qalanyń qurylys saiasaty áleýmettik infraqurylymdy damytýǵa, abattandyrýǵa jáne jasyl aimaqtar qurýǵa basymdyq beredi.
Qala ákiminiń aitýynsha, barlyq jumys «adamdarǵa arnalǵan qala» qaǵidatyna negizdelip otyr. Iaǵni, basty nazar turǵyndardyń ómir súrý sapasyna, qoljetimdi ári yńǵaily orta qalyptastyrýǵa aýdarylǵan. Injenerlik infraqurylym aldan ala josparlanyp, damý qarqyny turǵyndar qajettilikterinen ozyq júrýi tiis.
Astanada kólik júiesin damytý da basty baǵyttardyń biri sanalady. Qoǵamdyq kóliktiń úlesin qazirgi 41 paiyzdan 71 paiyzǵa deiin arttyrý kózdelip otyr. Bul rette avtobýs parki jańartylyp, jańa jolairyqtar salynady. Sonymen qatar, LRT jobasyn iske asyrý jalǵasýda. Alǵashqy jeliniń synaq rejiminde iske qosylýy biylǵy qyrkúiekke josparlanǵan.
Ekologiia jáne kógaldandyrý máselesi de erekshe nazarda. Sońǵy úsh jyl ishinde Astanada 2,5 millionnan astam aǵash otyrǵyzyldy. Qalada kógaldandyrý erejeleri qabyldanyp, aǵashtardy tsifrlandyrý júiesi engizildi. Qoǵamdyq keńistikter men kóshelerdi abattandyrý, jaǵalaýlardy kórkeitý jumysy júrgizilýde. Kishi Taldykól aýmaǵynda ekopark salynyp jatyr, sondai-aq Green Line jaiaý júrginshiler joly men Damu parki qolǵa alynǵan.
Elordada kreativti indýstriia men oqiǵaly týrizm de damyp keledi. Qalada halyqaralyq mádeni jáne sporttyq is-sharalar jii ótedi. Biyl Astanada álemdik juldyzdardyń kontsertteri de josparlanǵan.
Seminar sońynda qala ákimi Astananyń aldaǵy damýy qalalyq qyzmetterdiń tolyqtai úilesimdi jumysy men halyqaralyq úzdik tájiribelerdi engizýge bailanysty ekenin atap ótti.
