Aimaq basshysy Nariman Tóreǵaliev jetekshilik etken batysqazaqstandyq resmi jáne iskerlik delegatsiia Qytaiǵa jumys saparymen bardy. Onyń aiasynda oblys ákimi Liaonin provintsiiasynyń gýbernatory Van Sinveimen kezdesti. Is-sharanyń ótýine Qazaqstan Respýblikasynyń Qytai Halyq Respýblikasyndaǵy Elshiligi qoldaý kórsetti, dep habarlaidy dalanews.kz.
Halyq sany 40 millionnan asatyn Liaonin provintsiiasy – munai-gaz salasynda tájiribesi mol, ónerkásiptik áleýeti joǵary óńir. Bul salalar Batys Qazaqstan oblysy úshin de erekshe mańyzǵa ie. Agrarlyq sektordy damytýdaǵy qolaily múmkindikter jaǵynan da qos ólkeniń uqsastyǵy kóp.
Aimaq basshysy Nariman Tóreǵaliev Qazaqstan-Qytai qarym-qatynastarynyń «altyn 30 jyldyǵy» aiasynda óńiraralyq yntymaqtastyq jańa deńgeige kóteriletinine senim bildirdi. Oblys ákimi eki el kóshbasshylarynyń basshylyǵymen Qytai men Qazaqstan arasyndaǵy strategiialyq áriptestik sapalyq turǵydan nyǵaiyp kele jatqanyn atap ótti.
- Prezident Qasym-Jomart Kemeluly Toqaevtyń tapsyrmasymen biz óńirdegi investitsiialyq ahýaldy odan ári jaqsartyp, qyzyǵýshylyq tanytqan kompaniialarǵa jańa múmkindikter usynyp otyrmyz. Qytailyq investorlarmen birlesip, suiyq metanol, tsement zaýyttary, gaz týrbinaly jáne jel elektr stansalaryn salý jáne ózge de mańyzdy jobalardy iske asyryp jatyrmyz. Jumys oryndaryn asham, óndiristi damytam degen investorlar úshin arnaiy ekonomikalyq aimaq bar, - dedi Nariman Tóreǵaliev.
Liaonin provintsiiasynyń gýbernatory Van Sinvei de óńiraralyq yntymaqtastyqty damytýǵa nietti ekenin jetkizdi.
- QHR Tóraǵasy Si Tszinpin eki el bir-birine senim artatyn strategiialyq seriktester ekenin únemi atap ótedi. Keiingi jyldary Liaonin ólkesi men Qazaqstan arasyndaǵy bailanys beki tústi. Byltyr ekijaqty saýda ainalymy 2,7 milliard iýanǵa jetti. Sizderdiń Halyqaralyq baýyrlas qalalar forýmyna kelýlerińiz ortaq maqsat jolyndaǵy shynaiy yqylasty bildiredi, - dedi Van Sinvei.
Qytailyq tarap dostyq bailanys, óndiristik yntymaqtastyqty tereńdetýden bólek, Qytai men Qazaqstan mádenietiniń jyly aiasynda mádeni-gýmanitarlyq bailanystardy keńeitýge de múddelilik tanytty.
