Bergei Rysqalievtiń páterin joǵary laýazymdy sheneýnik iemdenip alǵan bolýy múmkin, dep habarlaidy Dalanews.kz.
Áńgime – Aqtóbe qalasynyń ortalyǵyndaǵy, Bergei Rysqalievke tiesili bolǵan jyljymaityn múlik jaily.
Shapalaq.kz málimetinshe, Aqtóbedegi turǵyn úi qatynastary bóliminiń sheneýnikteri qyzmet babyn asyra paidalandy degen kúdikke ilingen. Basylym málimetine sáikes, prokýratýra bólimniń burynǵy basshysy Jandos Álimovke qatysty tergeý bastaǵan. Qazirgi tańda ol Aqtóbe oblysynyń eńbek inspektsiiasy basqarmasyn basqarady.
Is materialdarynda kórsetilgendei, 2021 jyldan 2024 jylǵa deiin Álimov ótinish berýshilerdiń málimetteriniń rastyǵyn teksermegen, sonyń saldarynan 33 páter zańsyz jekeshelendirilgen.
"Qala turǵyn úi qorynan zańsyz «sytyp alynǵan» páterlerdiń basym bóligi Aqtóbe qalasynyń «Turǵyn úi qatynastary bólimi» MM qyzmetkerleriniń menshigine ótken", – delingen jariialanymda.
Prokýratýranyń esebinshe, 33 páterdiń zańsyz jekeshelendirilýinen kelgen zalal 122 586 779 teńge.
Basylym málimetinshe, memlekettik menshik qatarynan shyǵyp ketken jyljymaityn múlikterdiń arasynda kezinde Bergei Rysqalievke tiesili bolǵan Aqtóbe qalasynyń ortalyǵyndaǵy páter de bar. Atalǵan turǵyn úi qashqyn oligarhtan sot úkimimen tárkilengen bolatyn.
Atyraý oblysynyń burynǵy ákimi Bergei Rysqaliev Qazaqstannan qashyp ketken. Ol uiymdasqan qylmystyq top qurǵany úshin halyqaralyq izdeýde júr jáne 17 jylǵa bas bostandyǵynan aiyrylǵan. Rysqalievter sońǵy 12 jyldan beri Ulybritaniiada turady. Eks-ákim bul elden saiasi baspana alǵan.
