2024 jyly Qazaqstan Qarýly kúshteriniń qataryna 40 202 azamat shaqyrtylǵan. Al biyl áskeri boryshyn óteýi tiis azamattar sany 42 098-ge jetip otyr. Alaida olardyń 20 myńǵa jýyǵy óz erkimen áskeri qyzmetke barýdan bas tartqan, dep habarlaidy Dalanews.kz.
Bul týraly QR Qorǵanys ministrligi Kazinform agenttiginiń resmi saýalyna bergen jaýabynda málimdedi.
“2024 jyly merzimdi áskeri qyzmetke 40 202 adam shaqyryldy. 2025 jyly bul san 42 098 adamǵa jetpek. Alaida Konstitýtsiianyń 36-babynda jáne Prezident Jarlyǵynda belgilengen talaptarǵa qaramastan, shamamen 20 myń azamat áskeri boryshyn óteýden jaltaryp júr”, — dep habarlady ministrlik.
Vedomstvo málimetinshe, eshbir zańdy sebepsiz áskeri qyzmetten bas tartqan azamattar bir jylǵa deiin bas bostandyǵynan aiyrylýy múmkin.
“Qazaqstan Respýblikasynyń Ákimshilik quqyq buzýshylyq týraly kodeksiniń 647-babyna sáikes, áskeri esepte turǵan nemese esepke turýy tiis azamat shaqyrý qaǵazynda kórsetilgen merzimde jergilikti áskeri basqarý organyna kelmese, oǵan 5 ailyq eseptik kórsetkish (AEK)mólsherinde aiyppul salynady. Al 648-bapqa sáikes, meditsinalyq tekserýden nemese áskeri esepke qoiý, ne shaqyrý komissiiasynyń joldamasy boiynsha tekseristen ótýden jaltarǵan azamatqa da 5 AEK kóleminde aiyppul qarastyrylǵan.
Sonymen qatar Qylmystyq kodekstiń 387-babyna sáikes, merzimdi áskeri qyzmetten zańsyz sebepsiz jaltarǵan azamatqa 1 000 AEK-ke deiin aiyppul salynyp, nemese bir jylǵa deiin bas bostandyǵy shektelýi ne aiyrylýy múmkin”, — delingen Qorǵanys ministrliginiń jaýabynda.
