Májilis depýtaty Ashat Aımaǵambetov áleýmettik jelidegi jańa jazbasynda Qazaqstandaǵy alǵashqy medısınalyq-áleýmettik kómek júıesindegi máselelerge toqtaldy, dep habarlaıdy Dalanews.kz.

“Astana qalasyndaǵy №4 qalalyq emhanada kezdesý ótkizip, qabyldanǵan jańa zańdardyń iske asyrylýy men PMSP-niń ózekti máselelerin talqyladyq.

Tirkelgen medısınalyq ınsıdentterdiń sany 10 eseden astam ósipti. Bul mańyzdy qadam, sebebi buryn jasyryn qalyp kelgen jaǵdaılar tirkele bastady. Endi bul derekterdi medısınalyq personaldy oqytý jáne qyzmet sapasyn arttyrý úshin tıimdi paıdalaný qajet”, — deıdi depýtat. 

Onyń aıtýynsha, aýrýhanalarǵa medısınalyq zertteýlerdi kvotalaý – mysaly, aıyna MRT nemese KT sanyna shekteý qoıý – kezek sanynyń kóbeıýine ákeledi.

“Medısınalyq zertteýlerdi kvotalaý.

Densaýlyq saqtaý mınıstrligi engizgen syzyqtyq shkala júıesi emhanalarda zertteýlerdiń sanyn shekteıdi (mysaly, aıyna 10 MRT nemese 10 KT). Bul birneshe problema týdyrady:

• Kezekterdiń uzarýy. Apparattar bos tursa da, aılyq kvota taýsylǵannan keıin naýqastardy kelesi aılarǵa jazady.

• Uzaq kútý qajettigi halyqtyń narazylyǵyn týdyrady”, — deıdi ol.

Ashat Aımaǵambetov keshendi jan basyna shaqqandaǵy normatıvtiń (KJN) tıimdiligine de kúmán keltirdi.

“Komplekstik jan basyna shaqqandaǵy normatıvtiń (KPN) tıimdiligi.

Emhanalar ár tirkelgen azamat úshin aı saıyn 1600 teńge (qosymsha koefısıenttermen) alady. Bul aqsha azamat emhanaǵa júgingenine nemese júginbegenine qaramastan beriledi. Budan bólek, eger pasıent kelse, emhana qosymsha qarjy alady. Bul júıe emhanalardy tirkelgen halyqpen belsendi jumys isteýge qalaı yntalandyrady? Qarajat qanshalyqty tıimdi jumsalady?” – dep suraq qoıdy depýtat.

Ol ózine tirkelgen emhananyń jumysyn mysal retinde keltirdi.

“Emhana qyzmetterdi solaı uıymdastyrady, bir kómek alý úshin qalany aralaýǵa týra keledi: ÝZI – bir jerde, KT – basqa jerde, dáriger – úshinshi jerde. Aqyrynda, aqyly klınıkaǵa barý jeńildeý bolyp shyǵady, biraq memlekettik emhana báribir aı saıyn men úshin tirkelgen pasıent retinde KJN alady,” – dep atap ótti halyq qalaýlysy.