2025 jylǵy 1 qańtardan bastap Qazaqstanda jumys berýshiniń mindetti zeinetaqy jarnasynyń (JMZJ) mólsheri ulǵaidy. Qazir ol 2,5%-dy quraidy, dep jazady Dalanews.kz BJZQ baspasóz qyzmetine silteme jasai otyryp.
Esterińizde bolsa, 2024 jyldyń 1 qańtarynan bastap barlyq jumys berýshiler zeinetaqy jinaqtaryn qalyptastyrýǵa qatysyp, BJZQ-ǵa jumys berýshiniń mindetti zeinetaqy jarnasyn (JMZJ) óz qyzmetkerleriniń paidasyna aýdara bastady. Osylaisha, Qazaqstannyń jinaqtaýshy júiesi jańa quramdaýysh bólikpen tolyqtyryldy.
Áleýmettik kodekske sáikes, qyzmetkerler óz kiristerinen tóleitin 10% mindetti zeinetaqy jarnalarynan (MZJ) aiyrmashylyǵy – JMZJ-ny jumys berýshi óz qarajaty esebinen aýdarady.
"Jyl saiyn JMZJ mólsheri kezeń-kezeńimen ósip otyrady (2024 jyly 1,5%, 2025 jyly 2,5%, 2026 jyly 3,5%, 2027 jyly 4,5%) jáne 2028 jyly 5% jetedi dep kútiledi", - deidi qordaǵylar.
Jumys berýshiniń JMZJ esepteý úshin qabyldaityn jumyskerdiń tabys somasy tiisti kúntizbelik jylǵa belgilengen eń tómengi jalaqynyń (ETJ) kem degende bireýin jáne kóp degende 50-eselengen mólsherinen aspaýy tiis.
Jumys berýshiler myna azamattarǵa JMZJ tóleýden bosatylady:
- zeinet jasyndaǵy,
- 1-shi jáne 2-shi toptaǵy merzimsiz múgedektigi bar,
- áskeri qyzmetshiler men olarǵa teńestirilgen adamdar,
- sondai-aq 1975 jyldyń 1 qańtaryna deiin týǵan adamdar.
Jumys berýshilerdiń JMZJ-ny ýaqytyly jáne tolyq tólep otyrýyn baqylaý QR Qarjy ministrliginiń Memlekettik kirister komitetine júktelgen.
"Qyzmetkerlerdiń jeke zeinetaqy shottaryna túsetin MZJ-dan taǵy bir ereksheligi, JMZJ shartty zeinetaqy shottaryna esepteledi jáne qyzmetkerlerdiń menshigi bolyp sanalmaidy. Tiisinshe, JMZJ esebinen qalyptasqan jinaqtardy qyzmetkerler muraǵa qaldyra almaidy. JMZJ zeinetaqyny ortaq (taratýshy) qaǵidaty boiynsha tóleýge arnalǵan. Sondyqtan, Qazaqstan azamattyǵynan aiyrylǵan nemese qaitys bolǵan adamdar úshin tólenip kelgen JMZJ qalǵan qatysýshylar arasynda bólinip, ómir boiy tólenetin bolady".
JMZJ engizý 1975 jyly jáne odan keiin týǵan jumysshylardyń ortaq zeinetaqy alýǵa múmkindik beretin 1998 jylǵa deiingi jumys ótiliniń joqtyǵyn nemese múlde az ekendigin eskere otyryp, osy azamattardy zeinetaqymen qamsyzdandyrýǵa baǵyttalǵan.
"Bolashaqta olardyń jiyntyq zeinetaqysy úsh quramdaýysh kózden, iaǵni bazalyq - memleketten, jinaqtaýshy - BJZQ-ǵa aýdarǵan mindetti zeinetaqy jarnalary jáne shartty-jinaqtaýshy - jumys berýshilerdiń jarnalary esebinen qalyptasatyn bolady", - deidi qordaǵylar.
Buǵan deiin 2024 jyldyń barysynda qazaqstandyqtar BJZQ-dan 565,5 mlrd teńge sheship alǵanyn jazǵanbyz.
