Qyrǵyzstannyń tuńǵysh prezidenti Asqar Aqaev qazirgi memleket basshysy Sadyr Japarovqa eldi basqarý úshin qosymsha ýaqyt berý qajet dep sanaidy. Ol bul pikirin 19 maýsym kúni Ystyqkólde ótken halyqaralyq forýmda aitty, dep habarlaidy dalanews.kz.
Aqaevtyń sózinshe, búginde Qyrǵyzstanda aýqymdy jobalar júzege asyrylyp jatyr jáne bul úderisti ol «qyrǵyzdyń ekonomikalyq keremeti» dep baǵalady.
«Qazirgi prezidentke osy ekonomikalyq baǵdarlamany tolyq iske asyrý úshin halyq qosymsha mandat bergeni durys bolar edi. Mundai jobalardy aiaqtaýǵa keminde 8-10 jyl qajet», – dedi eks-prezident.
Asqar Aqaev Qyrǵyzstandy 1990 jyldan 2005 jylǵa deiin basqardy. Ol 2005 jylǵy Naýryz revoliýtsiiasynan keiin qyzmetinen ketip, sodan beri Máskeýde turyp keledi.
2022 jyly Aqaev Qyrǵyzstanǵa eki ret kelip, «Qumtór» ken ornyna qatysty jemqorlyq isi boiynsha tergeýge qatysqan. Keiin Bas prokýratýra qylmystyq qýdalaý merziminiń ótýine bailanysty oǵan taǵylǵan aiyptardyń alynǵanyn habarlaǵan.
Byltyr qyrkúiekte burynǵy prezident parlamentten ózine eks-prezident mártebesin qaitarýdy suraǵanymen, bul ótinish qoldaý tappady.
Aita keteiik, Aqaevtyń ózi bilik basynda bolǵan jyldary prezidenttik ókilettigin birneshe márte uzartqan.
