Mańǵystaý oblysynyń prokýratýrasy Aqtaýda jas qyzdy zorlap, esirtki bergen 5 jigittiń isine qatysty málimdeme jasady. Olar kinálilerdi ómir boiyna bas bostandyǵynan aiyrýdy talap etti, dep habarlaidy Dalanews.kz.
“2024 jylǵy 19 jeltoqsanda Mańǵystaý oblysynyń qylmystyq ister jónindegi mamandandyrylǵan aýdanaralyq soty jábirlenýshige qatysty jasalǵan qylmys boiynsha negizgi figýrantqa 20 jyl, al onyń janyndaǵy qylmysqa úles qosqan tórt jigitke 7 jyldan 8,5 jylǵa deiin bas bostandyǵynan aiyrý taǵaiyndaldy. Óz kezeginde prokýror óziniń jaryssózinde bas figýrantqa ómir boiyna bas bostandyǵynan aiyrýdy, al basqa qatysýshylarǵa 15 jyldan 16 jylǵa deiin bas bostandyǵynan aiyrýdy suraǵan”, dep habarlady prokýratýra.
5 qańtarda oblys prokýrory sot úkimi men jaza mólsherine kelispegendikten, sot jaryssózinde baiandalǵan ustanymǵa sáikes ótinishhat engizdi.
Eske salaiyq, buǵan deiin nemolchikz_official áleýmettik jelide 2024 jyldyń mamyr aiynda Aqtaýda bolǵan jantúrshigerlik oqiǵany jariialaǵan edi.
14 mamyr kúni túnde Aqtaýda bir top er adam sportpen ainalysyp, fitnes-jattyqtyrýshy bolyp jumys istegen qyzdy kólikke kúshtep otyrǵyzyp, mefedron berip zorlaǵan. Tańǵa deiin qyzdy qinap, qala berdi telefony arqyly 2 mln teńge kóleminde nesie rásimdegen. Qyzdyń týystary sot sheshimine qarsy shaǵym túsirip, istiń ádil qaralýyn surady.
Prokýror bas zorlaýshyǵa ómir boiyna bas bostandyǵynan aiyrý jazasyn suraǵan, al qalǵan tórteýine 15-16 jylǵa deiin jaza taǵaiyndalýy tiis bolatyn. Prokýratýra olardy zorlaý, jynystyq zorlyq-zombylyq, ózin-ózi óltirýge deiin jetkizý, esirtki zattaryn qoldanýǵa kóndirý, zańsyz bas bostandyǵynan aiyrý jáne adam urlaý, bopsalaý boiynsha aiyptaǵan. Alaida sýdia qyzdyń ólimin zorlyqpen bailanystyrmaǵan. Osylaisha qylmyskerlerdiń jazasyn jeńildetken. Marqumnyń otbasy bul sheshimge apelliatsiialyq shaǵym túsirdi.
