ماڭعىستاۋ وبلىسىنىڭ پروكۋراتۋراسى اقتاۋدا جاس قىزدى زورلاپ، ەسىرتكى بەرگەن 5 جىگىتتىڭ ىسىنە قاتىستى مالىمدەمە جاسادى. ولار كىنالىلەردى ءومىر بويىنا باس بوستاندىعىنان ايىرۋدى تالاپ ەتتى، دەپ حابارلايدى Dalanews.kz.
“2024 جىلعى 19 جەلتوقساندا ماڭعىستاۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى جابىرلەنۋشىگە قاتىستى جاسالعان قىلمىس بويىنشا نەگىزگى فيگۋرانتقا 20 جىل، ال ونىڭ جانىنداعى قىلمىسقا ۇلەس قوسقان ءتورت جىگىتكە 7 جىلدان 8،5 جىلعا دەيىن باس بوستاندىعىنان ايىرۋ تاعايىندالدى. ءوز كەزەگىندە پروكۋرور ءوزىنىڭ جارىسسوزىندە باس فيگۋرانتقا ءومىر بويىنا باس بوستاندىعىنان ايىرۋدى، ال باسقا قاتىسۋشىلارعا 15 جىلدان 16 جىلعا دەيىن باس بوستاندىعىنان ايىرۋدى سۇراعان”، دەپ حابارلادى پروكۋراتۋرا.
5 قاڭتاردا وبلىس پروكۋرورى سوت ۇكىمى مەن جازا مولشەرىنە كەلىسپەگەندىكتەن، سوت جارىسسوزىندە باياندالعان ۇستانىمعا سايكەس ءوتىنىشحات ەنگىزدى.
ەسكە سالايىق، بۇعان دەيىن nemolchikz_official الەۋمەتتىك جەلىدە 2024 جىلدىڭ مامىر ايىندا اقتاۋدا بولعان جانتۇرشىگەرلىك وقيعانى جاريالاعان ەدى.
14 مامىر كۇنى تۇندە اقتاۋدا ءبىر توپ ەر ادام سپورتپەن اينالىسىپ، فيتنەس-جاتتىقتىرۋشى بولىپ جۇمىس ىستەگەن قىزدى كولىككە كۇشتەپ وتىرعىزىپ، مەفەدرون بەرىپ زورلاعان. تاڭعا دەيىن قىزدى قيناپ، قالا بەردى تەلەفونى ارقىلى 2 ملن تەڭگە كولەمىندە نەسيە راسىمدەگەن. قىزدىڭ تۋىستارى سوت شەشىمىنە قارسى شاعىم ءتۇسىرىپ، ءىستىڭ ءادىل قارالۋىن سۇرادى.
پروكۋرور باس زورلاۋشىعا ءومىر بويىنا باس بوستاندىعىنان ايىرۋ جازاسىن سۇراعان، ال قالعان تورتەۋىنە 15-16 جىلعا دەيىن جازا تاعايىندالۋى ءتيىس بولاتىن. پروكۋراتۋرا ولاردى زورلاۋ، جىنىستىق زورلىق-زومبىلىق، ءوزىن-وزى ولتىرۋگە دەيىن جەتكىزۋ، ەسىرتكى زاتتارىن قولدانۋعا كوندىرۋ، زاڭسىز باس بوستاندىعىنان ايىرۋ جانە ادام ۇرلاۋ، بوپسالاۋ بويىنشا ايىپتاعان. الايدا سۋديا قىزدىڭ ءولىمىن زورلىقپەن بايلانىستىرماعان. وسىلايشا قىلمىسكەرلەردىڭ جازاسىن جەڭىلدەتكەن. مارقۇمنىڭ وتباسى بۇل شەشىمگە اپەللياسيالىق شاعىم ءتۇسىردى.
