Qazaqstanda onlain saýdadan túsken tabys mólsheri jyl saiyn eselep artyp jatyr. Pandemiiadan bastalǵan onlain saýdanyń kórigi qazir qaryshtai túsken. Ulttyq statistika biýrosynyń deregine sensek, keiingi bir jylda Qazaqstandaǵy marketpleisterdiń saýda ainalymy 1,8 trln teńgeni qurady, dep jazady Dalanews.kz.
Muny sońǵy kezderi ár qalada taýardy alýǵa arnalǵan "posttamattardyń" qaptai bastaýynan da baiqaýǵa bolady.Kásipkerlerdiń aitýynsha, taýardy alyp ketý pýnktterine kúnine 100-150 adam keledi. Turmystyq zattar, kiim-keshek, oiynshyq – túrli tapsyrystaryn alyp ketip jatady. Saýda jáne integratsiia ministrliginiń aqparatyna sáikes, 2020 jyly elektrondy saýdadan túsken tabys kólemi 476,7 mlrd teńge bolsa, byltyrǵy jyldyń qorytyndysy boiynsha bul kórsetkish 2,4 trln teńgege jetken. Iaǵni, naryq úsh-aq jylda 5 ese ulǵaiǵan. Al onyń 72,4% úlesi marketpleisterge tiesili, dep habarlaidy 24KZ.
"Munda 200 mln-ǵa deiin túrli taýar bar. Ydystan bastap, kiim-keshek, tipti mysyqtyń tamaǵyna deiin, bylai aitqanda, bala-shaǵaǵa kez kelgen zattyń bári bar. Astana qalasynda qazir 170 núktesi bar, áli de 100 núkte ashylý kerek degen sybys estilip jatyr", - deidi kásipker Qýanysh Jetkergen.
Resmi tsifrlarǵa júginsek, osydan 5 jyl buryn, iaǵni 2019 jyly eldegi onlain saýda úlesi 1,8% ǵana bolsa, keiingi eki jylda 12%-dan asqanyn kóre alamyz
"Bekitilgen kórsetkishter boiynsha, ministrliktiń aldynda 2030 jylǵa deiin elektrondyq saýda úlesin 20%-ke arttyrý mindeti tur. Al qazirgi tańda ol bizde 12,7%-ti quraidy",- deidi QR SIM Elektrondyq jáne birjalyq saýda departamentiniń bas mamany Aigúl Orazaeva.
Onlain saýda, rasynda dástúrli saýdagerlerge qatty básekelestik tanytýdy ma? Máselen, Astana saýda úileri qoǵamynyń múshesi Muhtar Esbolǵanovtyń aitýynsha, jalpy eldegi eńbekpen qamtylǵan azamattardyń 16,8%-i osy dástúrli saýda sektorynda júr. Olardyń 5-7%-y jyl saiyn dúkenderin jaýyp jatyr. Sondyqtan bazardaǵylardyń saýdasy múlde joiylyp ketpese de, suiylyp jatqany baiqalady.
"Bazarda turǵan saýdagerler sany qazirgi kúnde 400-600 myń adam. Al asyrap otyrǵan otbasylarymen birge eseptesek, 2 mln adam. Sonda tiri saýdaǵa qarap otyrǵan 2 mln bizdiń azamattarymyzdyń erteń jumyssyz qalýy múmkin. Oǵan sebep eki jaqtyń saýda júrgizý múmkindikteri teń emes. Mysaly, elektrondy saýdada salyq máselesi durys qaralmaǵan. Al dúkenshiler túrli shyǵyndaryna bailanysty taýaryn ústemelep satýǵa májbúr", - deidi Astana saýda úileri qaýymdastyǵynyń múshesi Muhtar Esbolǵanov.
Qalai desek te, elektrondy saýda halyq úshin tiimdi bolyp tur. Sondyqtan úlesi de arta bereri anyq. Buǵan kóz jetkizgen dúkenshilerdiń kóbi qazir jaǵdaiǵa beiimdelip, áleýmettik jeli arqyly saýda júrgizýge mashyqtanýda.
Aita ketsek, 2024 jyly 19 qarashada Túrkiianyń monopoliiaǵa qarsy agenttigi Kaspi.kz aktsionerlik qoǵamynyń túrik elektrondyq kommertsiia platformalarynyń biri – Hepsiburada-ny satyp alý jónindegi kelisimin maquldady.
