Úkimet otyrysynda Mańǵystaý oblysynyń ákimi Nurdáýlet Qilybai Jumysshy mamandyqtary jylyn ótkizý jónindegi is-sharalar jospary bekitilgenin jáne óńirlik shtab óz jumysyna kiriskenin málimdedi,- dep habarlaidy Dalanews.kz.
2025–2026 jyldary oqý-zerthanalyq korpýsyn ashý, jańa ideialar hakatonyn, halyqaralyq «DostiSkills-2025» salalyq chempionatyn, halyqaralyq salalyq akkreditteýdi ótkizý josparlanyp otyr. Sondai-aq IT hub jáne jumys berýshilerdiń qoldaýymen quziretter ortalyǵyn ashý, biznestiń naqty suranystary boiynsha nysanaly bilim berý tapsyrysyn ulǵaitý jáne óńir kolledjderinde jańa mamandyqtar ashý qarastyrylǵan. Atap aitqanda, N. Bekbosynov atyndaǵy Mańǵystaý energetikalyq kolledji «Sýmen jabdyqtaý jáne sý burý júieleriniń tazartý qurylystaryn paidalaný», O. Turmaǵambetuly atyndaǵy Mańǵystaý indýstriialyq-tehnikalyq kolledji «Gidrogeologiia jáne injenerlik geologiia» mamandyǵy boiynsha kadr daiarlaidy.
Qazirgi ýaqytta kolledjderdiń bilim berý baǵdarlamalary Jańa mamandyqtar atlasynyń ózekti talaptaryna sai bolý úshin jańartylýda.
«Óńirde 2022 jyly eńbek naryǵyna sai jańa mamandyqtar ashý, jumyspen qamtýdyń turaqtylyǵyn qamtamasyz etý maqsatynda “Jańa mamandyqtardyń atlasy” iske asyrylyp, suranysqa ie bilim berý, týrizm, munai-gaz salasyndaǵy mamandyqtar aiqyndaldy. Nysanaly qarjylandyrý sheńberinde Esenov atyndaǵy ýniversitet joǵary oqý granty negizinde byltyr jáne biylǵy jyldarǵa Mańǵystaý oblysynyń jańa kásipter men quzirettilikter atlasy jumystary jalǵastyrylýda. Osy jylǵa qurylys, energetika, logistika salalaryna basymdyq berilip otyr. Qazirgi tańda osy Atlasqa sáikes tehnikalyq jáne kásiptik bilim uiymdarynyń bilim berý baǵdarlamalary boiynsha mikrobiliktilikterdi jańartý jumystary júrgizilýde. Kolledjderde salaǵa beiindeý jumystary kezeń-kezeńimen júrgizilýde. Bilikti mamandardy daiarlaý 89 mamandyqtyń 129 biliktiligi boiynsha oqytylýda. 2024-2025 oqý jylyna 65 mamandyqtyń 92 biliktiligi boiynsha 5615 orynǵa, bul 90%-y memlekettik bilim berý granty bólindi. Onyń ishinde 70 jumys berýshi men kolledj arasynda kelisim-shart negizinde naqty suranysyna sáikes memlekettik bilim berý grantyna 580 stýdent qabyldandy. Ol bizdiń óńirdegi “Kazkor-Transservis”, “Ozenspetsstroi”, “QazAzot” sekildi iri-iri mekemeler», — dep atap ótti Mańǵystaý oblysynyń ákimi Nurdáýlet Qilybai.
Kolledjderdiń materialdyq-tehnikalyq bazasyn jaqsartý úshin 2025 jylǵa qarai Mańǵystaý indýstrialdy-tehnikalyq kolledjinde emhananyń burynǵy ǵimaratyn oqý-zerthanalyq korpýsqa qaita josparlaý júrgizilýde, Beineý aýdanyndaǵy eki kolledj úshin jańa ǵimaratty jobalaý daiyndalýda.
