Ulytaý oblysy ákiminiń orynbasary jol erejesin buzyp, jurttyń ashýyn týǵyzdy, dep habarlaıdy Dalanews.kz.

Áleýmettik jelide taraǵan beınejazbaǵa sáıkes, Ulytaý oblysy ákiminiń orynbasary jóndeý jumystary endi ǵana aıaqtalǵan, áli tolyq qatpaǵan asfált ústimen kóligimen emin-erkin júrip ótken. Turǵyndar joldyń jabyq ekenin eskertý úshin arnaıy belgiler qoıylǵanyna qaramastan, sheneýniktiń olardy elemeı, jeke sharýasyn sheshýge asyqqanyn aıtady.

Beınejazbany túsirip, jarıalaǵan qala turǵyny Serik Dúısenulynyń aıtýynsha, ákim orynbasarynyń áreketi jumysshylardyń eńbegine degen qurmetsizdik ári turǵyndarǵa teris úlgi boldy.

Jeli qoldanýshylary bul jaǵdaıdy ótkir synǵa aldy.

«Eldegi tártipti saqtaýy tıis shendilerdiń ózi osylaı jasasa, qarapaıym halyqtan ne kútemiz? Jumysshylar kún-tún demeı, jol sapasyn jaqsartýǵa baryn salady. Al ákimniń orynbasary olardy elemeı, jańa asfálttyń ústimen kólik aıdaıdy», – dep pikir qaldyrdy jeli qoldanýshylarynyń biri.

Jurtshylyq ókilderi bılik ókilderinen halyqqa úlgi bolarlyq áreket kútetinin, alaıda bul jaǵdaı kerisinshe senimdi shaıqaltyp, eldiń kóńilinde jaǵymsyz áser qaldyrǵanyn jetkizdi.

Ázirge ákimdik tarapynan resmı túsinikteme berilgen joq. Al qoǵam ókilderi sheneýniktiń áreketine quqyqtyq baǵa berilip, tıisti shara qoldanylýyn talap etýde.