Túrkistan oblysynda jedel medısınalyq járdem qyzmetiniń sapasyn arttyrý maqsatynda 60 jańa sanıtarlyq avtokólik alynyp, medısınalyq mekemelerge tabystaldy. Jańa kólikterdiń jalpy quny – 4,2 mlrd teńgeden asady,- dep habarlaıdy Dalanews.kz
Zamanaýı jabdyqtarmen tolyq jabdyqtalǵan jedel járdem kólikteri oblystyń barlyq aýdandary men qalalaryna taratylyp, jedel járdem qyzmetiniń tıimdiligin arttyrýǵa múmkindik beredi. Jańa tehnıkanyń medısınalyq qural-jabdyqtary eresekterge de, 1 jastan asqan balalarǵa da arnalǵan. Avtokólikter portatıvti ókpeni jasandy jeldetý apparatymen, defıbrıllátormen, júrek-ókpe reanımasıasyna arnalǵan jıyntyqpen, elektrokardıografpen jabdyqtalǵan.
Túrkistan oblysynyń ákimi Nuralhan Kósherov jedel járdem kólikterin tapsyrý rásiminde bul bastamanyń memleket basshysy Qasym-Jomart Toqaevtyń «Árbir azamattyń ómiri men densaýlyǵy – memleket úshin eń qymbat qundylyq» degen qaǵıdatyna negizdelgenin atap ótti.
– Halyqtyń densaýlyǵy – memlekettiń basty baılyǵy. Densaýlyq saqtaý salasyn damytý – bizdiń basty mindetimiz. Búgin tabystalyp otyrǵan kólikter dárigerlerimizdiń kúndelikti eńbegin jeńildetip qana qoımaı, turǵyndarǵa kórsetiletin medısınalyq kómektiń sapasyn edáýir jaqsartady. Bul – halyqqa jaqyn bolýdyń naqty úlgisi. Bul kólikter zamanaýı medısınalyq qural-jabdyqtarmen qamtylǵan. Adal eńbekpen halyq aldyndaǵy abyroılaryńyz arta bersin, – dedi oblys ákimi.
Sońǵy jyldary Túrkistan oblysynda medısınalyq ınfraqurylymdy jańǵyrtý boıynsha aýqymdy jobalar qolǵa alynǵan. Atap aıtqanda, Túrkistan qalasynda 570 tósek-oryndyq kópbeıindi aýrýhananyń qurylysy aıaqtalýǵa jaqyn. Bul nysan iske qosylǵanda 1200-den astam medısına qyzmetkeri jumysqa tartylady. Birikken Arab Ámirlikteriniń Abý-Dabı qorymen áriptestik aıasynda 80 tósek-oryndyq perzenthana salynýda. 60 oryndyq ońaltý ortalyǵynyń qurylysy aıaqtalyp, jaqyn arada paıdalanýǵa beriledi. Saryaǵashta 300 oryndyq kópbeıindi keshen, Ordabasyda 200 oryndyq perınataldyq ortalyq salý jobasy ázirlendi. Ordabasy, Jetisaı, Saryaǵash aýdandaryndaǵy ortalyq aýrýhanalar 4,1 mlrd teńgege jóndeldi. Saıram aýdandyq aýrýhanasynda 3,1 mlrd teńgege kúrdeli jóndeý bastaldy. Endi aýdanaralyq aýrýhanalar MRT, KT, angıograf syndy aýyr medısınalyq tehnıkamen qamtylady.
Halyq sany men qajettiliktiń ósýine baılanysty, jedel járdem qyzmetine degen suranys jyl sanap artyp keledi. Eger 2023 jyldyń 8 aıynda jedel járdemge 512 myń shaqyrtý tirkelse, 2024 jyldyń 8 aıynda bul kórsetkish 635 myńǵa jetken. Iaǵnı, 123 myń shaqyrtýǵa artqan. Osyny eskergen óńir basshylyǵy 2023 jyly da 88 sanıtarlyq avtokólik satyp alǵan bolatyn. Buǵan qosa, 2 reanımobıl nárestelerge arnalǵan arnaıy kólik retinde satyp alyndy.
Jańa kólikterdiń artýy shuǵyl medısınalyq kómekti kórsetý ýaqytyn qysqartady. Ásirese shalǵaı aýyldar men jedel medısınalyq qoldaý qajet aýdandar úshin bul – naqty kómek.
