Abai oblysynyń ákimi Berik Ýáli «Oblystyq jedel meditsinalyq járdem stantsiiasynyń» jumysymen tanysty. Mekemeniń bas korpýsy «Salamatty Qazaqstan» memlekettik baǵdarlamasy aiasynda 2015 jyly ashylǵan. Búginde munda 872 meditsina qyzmetkeri jumys isteidi,- dep habarlaidy Dalanews.kz
Jedel járdem stantsiiasy ómirge qaýip tóndiretin jaǵdailar, jazataiym oqiǵalar men jedel aýrýlar kezinde eresekter men balalarǵa alǵashqy meditsinalyq kómek kórsetedi. Sonymen qatar meditsinalyq aviatsiia arqyly keńes berý, josparly jáne shuǵyl meditsinalyq kómek uiymdastyrylady. Nysan táýligine 1000-ǵa deiin shaqyrtý qabyldaidy.
Abai oblysynyń jedel meditsinalyq járdem qyzmeti Semei qalasynyń oń jáne sol jaǵalaýynda ornalasqan eki qosalqy stantsiiadan turady. Sonymen qatar Abai, Aiagóz, Besqaraǵai, Borodýliha, Jarma, Úrjar, Maqanshy, Kókpekti, Aqsýat aýdandary men Kýrchatov qalasyndaǵy 18 jedel meditsinalyq bólimsheni qamtidy.
Ortalyqta birqatar máseleler bar. Sharýashylyq blok men garaj ǵimarattary kúrdeli jóndeýdi, mekemeniń avtoparki tolyq jańartýdy qajet etedi. Qalanyń sol jaǵalaýynda ornalasqan Áýezov qosalqy stantsiiasy da eskirgen. Mekemeniń bas dárigeri Vladimir Li oblys ákiminen osy máselelerdi sheshýge qoldaý kórsetýdi surady.
Oblysymyzdyń týmasy Rýslan Sameteev Abaidyń 180 jyldyǵyna orai jedel meditsinalyq járdem stantsiiasyna quny 25 million teńge turatyn server júiesi men árqaisysy 1 million teńge turatyn 10 EKG qurylǵysyn syiǵa tartty. Aimaq basshysy týǵan jerin túletýge qoldaý bildirgen azamatqa alǵysyn aitty.
Oblys ákimi ǵimaratty aralap, dárigerlermen pikirlesip, tynys-tirshiligimen tanysyp shyqqan soń mekemege «HYUNDAI Santa FE» markaly qyzmettik avtokóliginiń kiltin tabystady.
Aimaq basshysy sala qyzmetkerleriniń mańyzdy ári jaýapty jumysyna sáttilik tilep, jedel meditsinalyq járdem stantsiiasynyń infraqurylymyn kezeń-kezeńimen jańǵyrtý jalǵasatynyn atap ótti.
«Jedel meditsinalyq járdem stantsiiasy – qalamyzdaǵy eń iri ortalyqtardyń biri. Mundaǵy mamandar táýlik boiy halyqqa qyzmet etedi. Sol sebepti zamanaýi talaptarǵa sai jabdyqtalýy tiis. Búgin kóterilgen máselelerdiń barlyǵyn bilemin. Nazarymda ustaimyn. Túitkildi máselelerdiń sheshý joldaryn qarastyramyz. Jergilikti ákimdik tarapynan tiisti qoldaý kórsetemiz», – dedi aimaq basshysy.
