Beijińde Qazaqstan Respýblikasynyń alǵashqy mádeni ortalyǵy ashyldy. Bul – ázirge sheteldegi jalǵyz qazaqstandyq ortalyq. Saltanatty rásimge QR Prezidenti Qasym-Jomart Toqaev, QR Mádeniet jáne aqparat ministri Aida Balaeva, QHR Mádeniet jáne týrizm ministri Sýn Ili, eki eldiń diplomattary men shyǵarmashylyq ziialy qaýym ókilderi qatysty.
Ortalyqtyń ashylýy – uzaqmerzimdi diplomatiialyq kelissózdiń jáne joǵary deńgeide qol jetkizilgen ýaǵdalastyqtyń nátijesi. 2022 jyly QHR Tóraǵasynyń Astanaǵa memlekettik sapary barysynda Qasym-Jomart Toqaev pen Si Tszinpin Qytai men Qazaqstanda teń negizde mádeni ortalyqtar qurý jóninde kelisimge kelgen bolatyn.
Jobanyń júzege asýy eki el arasyndaǵy mádeni almasýdyń mańyzdy kezeńine ainalyp, qazaqstandyq mádenietti halyqaralyq arenada tanytýǵa eleýli úles qosady. Sondai-aq bul bastama Qazaqstan men Qytai arasyndaǵy mádeni bailanystar men strategiialyq áriptestiktiń nyǵaiýýyna sep bolady.
Ortalyq Beijińniń bedeldi aýdanynda, Qytaidyń halyqaralyq jastar almasý ortalyǵynyń bir bóligi sanalatyn «21 ǵasyr» biznes-ortalyǵynda ornalasqan. Ortalyqtyń aýmaǵy –620 sharshy metr. Qazaqstan mádeni ortalyǵy Qytai aýditoriiasyna qazaqtyń dástúrin, ónern, tili men tarihyn jáne ulttyq taǵamdaryn tanystyratyn is-sharalar ótetin alańǵa ainalady.
Keńistik birneshe aimaqqa bólingen, olardyń interaktivti jabdyqtary Qazaqstan mádenietine barynsha tereń boilaýǵa múmkindik beredi.
Mádeni ortalyqtyń mańyzdy bóligi – ekspozitsiialyq aimaq. Munda júzden astam tarihi jádiger qoiylǵan. Olardyń qatarynda Saq dáýiri jádigerleriniń kóshirmeleri, Esik pen Berel qorǵandarynan tabylǵan zattar, sondai-aq qazaq halqynyń turmystyq buiymdary bar. Ortalyqqa kelgen kópshilik dombyra men qobyz sekildi mýzykalyq aspaptardy, dástúrli áiel áshekeilerin, «sandyq», «astaý», «syrmaqty» kóre alady. Bul eksponattar Qytai halqyna Qazaqstannyń bai tarihi-mádeni murasyn tereńirek túsinýge kómektesedi.
Sonymen qatar ekspozitsiiada qazaqstandyq sýretshilerdiń kartinalary, el tarihy men mádenietine arnalǵan sirek kitaptar usynylady. Mýltimediialyq ekrandar arqyly kelýshiler Qazaqstannyń tabiǵi jáne mádeni kórikti jerleri jaily derekti filmder men beinematerialdardy interaktivti túrde tamashalai alady.
Ortalyqtyń basty baǵyttarynyń biri – qazaq tili kabineti. Munda balalar men eresekterge arnalǵan sabaqtar men treningter ótedi.
Mýzyka jáne shyǵarmashylyq kabinetteri de ortalyqtyń mańyzdy elementi. Qytailyq qonaqtar dástúrli qazaq mýzykasy jaiynda bilip qana qoimai, dombyra men qobyzda oinaýdy úiretetin sheberlik sabaqtaryna qatysa alady. Sondai-aq bul jerde qazaqstandyq mýzykanttar men ártister óner kórsetetin kontsertter uiymdastyrylady.
Ádebiet súier qaýym úshin ortalyqta kitaphana men oqý zaly qarastyrylǵan. Munda qazaqstandyq avtorlardyń túrli janrdaǵy shyǵarmalary shet tilderde, sonyń ishinde qytai tilinde de usynylady. Negizgi eksponattardyń biri – qazaqtyń uly aqyny Abaidyń eńbekteri. Kitaphana dárister, tanystyrylymdar jáne ádebi keshter ótkizetin orynǵa ainalyp, qytailyq aýditoriianyń qazaq ádebieti men mádenietine qyzyǵýshylyǵyn arttyrýǵa yqpal etedi.
Mádeni ortalyqtyń kópfýnktsionaldy alańdary kórmeler, ǵylymi konferentsiialar, dóńgelek ústelder men simpoziýmdar ótkizýge paidalanylady. Bul is-sharalar Qazaqstan men Qytai arasyndaǵy mádeni jáne bilim berý bailanystaryn nyǵaitady.
Sondai-aq ortalyq aýmaǵynda «Sandyq» meiramhanasy jumys isteidi, qazaqtyń ulttyq taǵamdaryn daiyndaýda sheberlik sabaqtaryn ótkizedi.
Bul ortalyq Qazaqstan mádenieti men tarihyn tanýǵa baǵyttalǵan bilim berý jáne mádeni jobalardy damytatyn bolady. Onda tek til men ónerdi úiretip qana qoimai, sonymen birge ǵylymi zertteýler men mádeni dástúrlerdi tanystyrýǵa arnalǵan keń aýqymdy jobalar da jasalady.
Aldaǵy jartyjyldyqta Qazaqstan men Qytaidyń jas kásipkerleri, ǵalymdary, shyǵarmashylyq ókilderi arasyndaǵy tájiribe almasý josparlanǵan. Bul is-sharany Qytaidyń halyqaralyq jastar almasý ortalyǵymen qazaqstandyq tarap birlesip uiymdastyrmaq. Sondai-aq Beijiń til jáne mádeniet ýniversitetimen yntymaqtastyq týraly memorandýmǵa qol qoiý, sonyń negizinde Qazaqstan men Qytai stýdentteri arasynda turaqty túrde tájiribe almasý jospalanǵan.
Ortalyq qazaq kinosyna, teatryna, mýzykasyna jáne ónerine arnalǵan túrli festivalder ótkizetin alańǵa ainalady. Osylaisha Beijińdegi mádeni ortalyq Qazaqstandy álemdik arenada tanystyrýdyń jańa kókjiegin ashyp, halyqaralyq mádeni yntymaqtastyq strategiiasyndaǵy mańyzdy bóligi bolmaq.
QR Mádeniet jáne aqparat ministrliginiń baspasóz qyzmeti
