Olıgarhtardyń jarty mıllıard teńgelik áshekeıleri men saǵattary aýksıonǵa shyǵarylady. Buǵan deıin tárkilengen áshekeı buıymdar, sývenırlik monetalar men saǵattar satylymǵa qoıylady, dep habarlaıdy Dalanews.kz.
«Qaıtarylǵan aktıvterdi basqarý kompanıasy» JSHS E-Qazyna veb-platformasynda elektrondy aýksıon ótkiziletinin málimdedi. Bul joly satylymǵa zergerlik áshekeıler, sývenırlik monetalar men saǵattar qoıylady. Lottardyń jalpy bastapqy quny – 548 145 236 teńge. Aýksıon 2025 jylǵy 16–18 qyrkúıek aralyǵynda ótedi.
"Saýda-sattyq onlaın formatta ótedi, bul kez kelgen núkteden qatysýǵa múmkindik beredi. Qaıtarylǵan aktıvterdi basqarý kompanıasy barlyq rásimderdiń ashyqtyǵyna kepildik beredi jáne lottar týraly tolyq aqparat, onyń ishinde sıpattamasy men baǵalaý qunyna qoljetimdilikti qamtamasyz etedi", – delingen habarlamada.
Uıym saıtynyń derekterine sáıkes, 64 lottyń ishinde eń qymbaty – quny 150 mln teńge turatyn Ulysse Nardin saǵaty bolmaq.
