Memleket basshysy Qasym-Jomart Toqaevtyń Qazaqstan halqyna Joldaýy qarsańynda Premer-Ministrdiń jáne Úkimet músheleriniń qatysýymen «AMANAT» partiiasy fraktsiiasynyń keńeitilgen otyrysy ótti. Depýtattar Prezidenttiń Joldaýlary men «Ádiletti Qazaqstan: bárimiz jáne árqaisymyz úshin. Qazir jáne árdaiym» Sailaýaldy baǵdarlamasynyń júzege asyrylý barysy týraly aqparatty tyńdady,- dep habarlaidy Dalanews.kz
Is-sharany ashqan Májilis Spikeri, «AMANAT» partiiasynyń Tóraǵasy Erlan Qoshanov ár Joldaý – el damýynyń strategiialyq baǵytyn aiqyndaitynyn jáne azamattardyń eń ózekti suraqtaryna júieli jaýap beretinin atap ótti.
«Memleket basshysynyń Joldaýlary, Prezidenttiń Sailaýaldy baǵdarlamasy – mańyzdy qujattar. Al olardyń sapaly oryndalýy – qoǵamnyń bilikke degen seniminiń kepili. Adamdar naqty ózgeristerdi dál qazir kórgisi keledi. Sol sebepti bizdiń, iaǵni zań shyǵarýshylar men Úkimettiń ortaq mindeti – tapsyrmalardy sapaly ári der kezinde oryndaý. Sondyqtan ár saiasi maýsym basynda Úkimetpen «saǵat sáikestendirý» tájiribesin engizýimiz kezdeisoq emes. Búginge deiin atqarylǵan jumysty baǵamdap, qai máselege basa nazar aýdarý kerek ekenin aiqyndaimyz», – dedi Erlan Qoshanov.
Óz kezeginde, Premer-Ministr Oljas Bektenov Prezident Joldaýlary men Sailaýaldy baǵdarlamasyn júzege asyrý boiynsha Úkimet tarapynan atqarylǵan jumysqa toqtaldy.
Máselen, byltyr sheteldik kapitaldyń qatysýymen 1,3 mlrd. AQSh dollary somasyna 45 joba paidalanýǵa berildi. Jalpy alǵanda, jalpyulttyq pýlǵa quny 144 mlrd. AQSh dollaryn quraityn 1,1 myńnan astam joba kiredi. Jyl basynan beri ónerkásip óndirisiniń ósimi byltyrǵy kórsetkishten 6,9%-ǵa asyp tústi. Biyl 20 myńnan astam jumys ornyn asha otyryp, 1,5 trln teńge somasyna 190 jańa óńdeýshi ónerkásip kásipornyn iske qosý josparlanýda.
Úkimet basshysy «Keleshek mektepteri» ulttyq jobasyna jeke toqtaldy. Onyń aiasynda 310 myń oryndyq 160 mektep salyndy. «Aýylda densaýlyq saqtaýdy jańǵyrtý» ulttyq jobasy sheńberinde óńirlerde 540 meditsinalyq nysan paidalanýǵa berildi. Olar shamamen 1 mln aýyl turǵynyn qamtidy. Bul – halyqtyń áleýmettik ál-aýqatyn arttyrý jónindegi Prezident saiasatynyń aiqyn kórsetkishteri.
«Tarifti investitsiiaǵa aiyrbastaý» baǵdarlamasy aiasynda 2 jylda 12 myń shaqyrymnan astam injenerlik jelini jóndeýge 600 mlrd teńgeden astam qarajat tartylyp, nátijesinde atalǵan jelilerdiń tozýyn 6,2%-ǵa tómendetýge múmkindik berdi. Biyl kólik salasynda 13 myń shaqyrym jol jóndeý jáne salý jumysy qolǵa alyndy. Al temirjol salasynda «Dostyq-Moiynty» ýchaskesiniń ekinshi joldaryn salý jumysy aiaqtalýda. Tsifrlandyrý salasynda IT-qyzmetter eksportynyń ósimi baiqaldy. Iaǵni, kórsetkish 2021 jyly 30 mln dollardan 2024 jyly 700 mln AQSh dollaryna deiin artty.
Úkimet Áleýmettik-ekonomikalyq damý boljamyn jáne aldaǵy úsh jyldyq kezeńge arnalǵan respýblikalyq biýdjet jobasyn maquldap, Parlamentke engizdi. Oǵan sáikes, aldaǵy úsh jylda ekonomikanyń naqty ortasha jyldyq ósimi 5,3%-dy quraidy.
Oljas Bektenov Úkimet Prezident bastamasymen qolǵa alynǵan «Taza Qazaqstan» jobasy men «Zań jáne tártip» qaǵidatyn júzege asyrý boiynsha belsendi jumys istep jatqanyn aitty.
«Memleket basshysy ustanǵan baǵyt arqyly el ekonomikasy turaqty ósimge qol jetkizdi. Biz úshin basym baǵyt sanalatyn óńdeý ónerkásibinde oń úrdis saqtaldy. Taý-ken ónerkásibindegi sirek jáne jerde sirek kezdesetin metaldardy igerý oryndarynan ósimniń tyń múmkindikterin kórip otyrmyz. Parlamentpen tyǵyz jumys istep, alǵa qoiylǵan barlyq mindetti oryndaýdy jalǵastyramyz. Bizdiń ortaq maqsatymyz – aldaǵy ýaqyttaǵy turaqty damýdy qamtamasyz etý», – dedi ol.
Jiyn barysynda Premer-Ministr men Úkimet músheleri fraktsiia depýtattarynyń suraqtaryna jaýap berdi. Bul suraqtar ekonomikany damytýdy, biznesti, aýyl sharýashylyǵyn, óndiristi qoldaýdy, azamattardyń tabysyn arttyrýdy, áleýmettik saiasatty jaqsartýdy, óńirlerdiń infraqurylymdyq damýynyń naqty máselelerin sheshýdi jáne ózge de taqyryptardy qamtydy.
Jiyndy qorytyndylai kele, Májilis Tóraǵasy Erlan Qoshanov Memleket basshysynyń Joldaýlarynda jáne Sailaýaldy baǵdarlamasynda qamtylǵan barlyq tapsyrma eldiń turaqty damýy men halyqtyń turmysyn jaqsartýdy qamtamasyz ete otyryp, júieli túrde júzege asyrylyp jatqanyn atap ótti. Kúrdeli geosaiasi jaǵdaiǵa qaramastan, Úkimet pen ákimder ekonomika ósimin qamtamasyz etti, memlekettiń barlyq áleýmettik mindettemeleri oryndalýda, infraqurylymdyq jobalar keshendi túrde qolǵa alynyp jatyr.
Sonymen qatar Májilis Spikeri Úkimet nazaryn aýdarýdy talap etetin birqatar baǵytty aiqyndap berdi. Máselen, aýyl turǵyndarynyń tabysyn arttyrýǵa baǵyttalǵan «Aýyl amanaty» partiialyq jobasyn turaqty qarjylandyrý jáne eginshilikke, qus sharýashylyǵyna, mal sharýashylyǵyna úiretetin «Agrosaýat» ortalyqtarynyń ashylýyn jedeldetý qajet. Ol Memleket basshysy byltyrǵy Joldaýynda bul jobaǵa qoldaý bildirip, ony el aýmaǵynda taratýdy tapsyrǵanyn eske saldy. Alaida osy másele áli de keiinge qaldyrylyp keledi.
Sondai-aq partiia Tóraǵasy jumyssyzdyq deńgeiin tómendetý jáne turǵyn úi-kommýnaldyq sharýashylyq reformasyn aiaqtaý jumysyn kúsheitý qajet ekenine nazar aýdardy. Sonymen qatar ol Aqmola oblysy Tselinograd aýdanynda óz nátijesin kórsetken «Baquatty audan» aýyldyq aýmaqtardy keshendi damytý jónindegi partiialyq pilottyq joba aiasyn keńeitýdi usyndy.
Erlan Qoshanov mundai kezdesýler naqty nátije beretinin atap ótti. Sebebi depýtattar óńirlerge únemi barady, adamdardyń ózekti máselelerin jaqsy biledi jáne olardy Úkimetke tikelei jetkize alady. Bul – «Kúshti Prezident – yqpaldy Parlament – esep beretin Úkimet» qaǵidatynyń naqty iske asqanynyń úlgisi. Jazǵy saparlarda halyq qalaýlylary 900 eldi mekenge baryp, 2000-ǵa jýyq azamatpen kezdesý ótkizdi. Turǵyndar tarapynan kelip túsken barlyq usynys qazir júielenip jatyr. Memlekettik organdarmen birlesip, olardyń sheshimin tabý joldary qarastyrylady.
«Úkimet pen Parlamenttiń ózara úilesimdi jumys atqarýy – tiimdi memlekettik saiasattyń negizi. Óitkeni bárimizdiń maqsatymyz bir. Ol – elimizdiń órkendeýi, halyqtyń turmys sapasynyń jaqsarýy. Bul úshin Prezidenttiń Sailaýaldy baǵdarlamasy men Joldaýlaryndaǵy tapsyrmalary der kezinde oryndalýy tiis. Ortaq murat jolynda jumyla áreket etkende ǵana biz naqty nátijelerge qol jetkizetinimiz anyq», – dedi partiia Tóraǵasy.
