Qarjy monitoringi agenttigi (QMA) tóraǵasynyń orynbasary Jeńis Elemesov burynǵy Eńbek jáne halyqty áleýmettik qorǵaý birinshi vitse-ministri, «Eńbek resýrstaryn damytý ortalyǵy» AQ basshysy Aqmádi Sarbasovqa qatysty qylmystyq is týraly aitty, dep habarlaidy Dalanews.kz.
Elemesovtiń aitýynsha, qazirgi ýaqytta Sarbasov qamaýda otyr.
«Qazir ol kúdikti retinde tergelip jatyr. Is para alý faktisi boiynsha júrgizilýde», - dep atap ótti QMA tóraǵasynyń orynbasary.
Sarbasovpen birge qylmystyq istiń figýranttary retinde burynǵy densaýlyq saqtaý vitse-ministri Dáýlet Arǵandykov jáne «Birinshi kredittik biýro» JShS bas direktory Rýslan Omarov bar.
«Alynǵan para somasy 75 myń dollar», - dedi Elemesov.
Aita keteiik, atalǵan para kólemi qazirgi baǵam boiynsha 40 million teńgeden asady.
Aqmádi Sarbasov 1977 jylǵy qazanda Batys Qazaqstan oblysynda týǵan. Ál-Farabi atyndaǵy Qazaq ulttyq ýniversitetin jáne Eýraziia gýmanitarlyq ýniversitetin támamdaǵan.
Eńbek jolyn 1994 jyly bastaǵan. Ár jyldary Ádilet ministrligi men Eńbek jáne halyqty áleýmettik qorǵaý ministrligi qurylymynda jumys istegen. 2017 jyldan 2019 jyldyń sáýirine deiin – Eńbek, áleýmettik qorǵaý jáne kóshi-qon komitetiniń tóraǵasy – bas memlekettik eńbek inspektory boldy.
2019 jyldyń sáýirinen 2020 jylǵa deiin Eńbek jáne halyqty áleýmettik qorǵaý vitse-ministri qyzmetin atqardy. 2020 jyldyń maýsymynda birinshi vitse-ministr bolyp taǵaiyndaldy. Bul qyzmetti Sarbasov 2025 jyldyń sáýirinde basqa jumysqa aýysýyna bailanysty bosatqan.
1 shildede Aqmádi Sarbasovtyń ustalǵany belgili boldy. Sol kezde ol Eńbek ministrliginiń qaramaǵyndaǵy «Eńbek resýrstaryn damytý ortalyǵy» AQ-ty basqaryp otyrǵan.
Birneshe kúnnen keiin QMA ortalyq basshylyǵy qarjy uiymdarynyń suranystaryn óńdeýde paidalanylatyn aqparattyq qyzmetter boiynsha múddelerdi ilgeriletý úshin «Birinshi kredittik biýrodan» júieli túrde para alyp otyrǵanyn habarlady. Agenttik kúdiktilerdiń páterlerinen iri kólemdegi dollar tabylǵanyn da málimdedi.
