قارجى مونيتورينگى اگەنتتىگى (قما) ءتوراعاسىنىڭ ورىنباسارى جەڭىس ەلەمەسوۆ بۇرىنعى ەڭبەك جانە حالىقتى الەۋمەتتىك قورعاۋ ءبىرىنشى ۆيسە-مينيسترى، «ەڭبەك رەسۋرستارىن دامىتۋ ورتالىعى» اق باسشىسى ءاقمادي سارباسوۆقا قاتىستى قىلمىستىق ءىس تۋرالى ايتتى، دەپ حابارلايدى Dalanews.kz.
ەلەمەسوۆتىڭ ايتۋىنشا، قازىرگى ۋاقىتتا سارباسوۆ قاماۋدا وتىر.
«ءقازىر ول كۇدىكتى رەتىندە تەرگەلىپ جاتىر. ءىس پارا الۋ فاكتىسى بويىنشا جۇرگىزىلۋدە»، - دەپ اتاپ ءوتتى قما ءتوراعاسىنىڭ ورىنباسارى.
سارباسوۆپەن بىرگە قىلمىستىق ءىستىڭ فيگۋرانتتارى رەتىندە بۇرىنعى دەنساۋلىق ساقتاۋ ۆيسە-مينيسترى داۋلەت ارعاندىكوۆ جانە «ءبىرىنشى كرەديتتىك بيۋرو» ج ش س باس ديرەكتورى رۋسلان وماروۆ بار.
«الىنعان پارا سوماسى 75 مىڭ دوللار»، - دەدى ەلەمەسوۆ.
ايتا كەتەيىك، اتالعان پارا كولەمى قازىرگى باعام بويىنشا 40 ميلليون تەڭگەدەن اسادى.
ءاقمادي سارباسوۆ 1977 جىلعى قازاندا باتىس قازاقستان وبلىسىندا تۋعان. ءال-فارابي اتىنداعى قازاق ۇلتتىق ۋنيۆەرسيتەتىن جانە ەۋرازيا گۋمانيتارلىق ۋنيۆەرسيتەتىن ءتامامداعان.
ەڭبەك جولىن 1994 جىلى باستاعان. ءار جىلدارى ادىلەت مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگى قۇرىلىمىندا جۇمىس ىستەگەن. 2017 جىلدان 2019 جىلدىڭ ساۋىرىنە دەيىن – ەڭبەك، الەۋمەتتىك قورعاۋ جانە كوشى-قون كوميتەتىنىڭ ءتوراعاسى – باس مەملەكەتتىك ەڭبەك ينسپەكتورى بولدى.
2019 جىلدىڭ ساۋىرىنەن 2020 جىلعا دەيىن ەڭبەك جانە حالىقتى الەۋمەتتىك قورعاۋ ۆيسە-مينيسترى قىزمەتىن اتقاردى. 2020 جىلدىڭ ماۋسىمىندا ءبىرىنشى ۆيسە-مينيستر بولىپ تاعايىندالدى. بۇل قىزمەتتى سارباسوۆ 2025 جىلدىڭ ساۋىرىندە باسقا جۇمىسقا اۋىسۋىنا بايلانىستى بوساتقان.
1 شىلدەدە ءاقمادي سارباسوۆتىڭ ۇستالعانى بەلگىلى بولدى. سول كەزدە ول ەڭبەك مينيسترلىگىنىڭ قاراماعىنداعى «ەڭبەك رەسۋرستارىن دامىتۋ ورتالىعى» اق-تى باسقارىپ وتىرعان.
بىرنەشە كۇننەن كەيىن قما ورتالىق باسشىلىعى قارجى ۇيىمدارىنىڭ سۇرانىستارىن وڭدەۋدە پايدالانىلاتىن اقپاراتتىق قىزمەتتەر بويىنشا مۇددەلەردى ىلگەرىلەتۋ ءۇشىن «ءبىرىنشى كرەديتتىك بيۋرودان» جۇيەلى تۇردە پارا الىپ وتىرعانىن حابارلادى. اگەنتتىك كۇدىكتىلەردىڭ پاتەرلەرىنەن ءىرى كولەمدەگى دوللار تابىلعانىن دا مالىمدەدى.
