Aqtaýlyq bloger Azamat Sarsenbaevtyń aitýynsha, astanalyq «Qazaqstan ekologiialyq qory» qory Mańǵystaý oblysynyń biýdjeti esebinen qustarǵa kómek kórsetý ortalyǵyn qurýǵa 10 mln teńge kóleminde grant alǵan, dep habarlaidy Dalanews.kz.
Alaida, onyń sózinshe, shyn máninde qustardy qutqarý jumystaryn áli de jergilikti eriktiler tegin atqaryp júr.
Instagram-daǵy «Astana_city» paraqshasynyń dereginshe, bloger baiqaýdyń jeńimpazy qoǵam belsendileriniń eńbegin ózine iemdenýge tyrysqanyn aitqan.
Sarsenbaevtyń sózine qaraǵanda, qor ókilderi oǵan 500 myń teńge tólep, seriktestik usynǵan. Ol muny eriktilerdiń eńbegin uiymnyń esebine engizý áreketi dep túsindiredi.
«Biz muny tegin istep keldik jáne kómek kútpedik. Endi qustardyń sýretterin olardyń esebi úshin surap otyr. Biz jabaiy qustardy tegin emdep, qaitadan tabiǵatqa jiberemiz, al qor osy jumysqa 10 mln teńge grant alyp, bizdiń eńbegimizdi óziniki etip kórsetkisi keledi», - dep atap ótti Sarsenbaev.
Mańǵystaý oblysynyń tabiǵi resýrstar basqarmasy granttyń bólingenin rastady. Vedomstvo qarjylandyrý tek ortalyq qurý men veterinarlyq qyzmet kórsetýdi ǵana emes, 20 ekskýrsiia ótkizýdi, «Qoqiqaz kúnine» arnalǵan festivaldi uiymdastyrýdy, shyǵarmashylyq jumystar konkýrsyn ótkizýdi jáne jasalǵan jumystar týraly materialdar jariialaýdy da qarastyrǵanyn naqtylady.
Baiqaýdyń jeńimpazy – «Qazaqstan ekologiialyq qory» QB bolǵan. Alaida úsh ai ishinde ortalyq ashylmaǵan, onyń qyzmeti týraly eseptik materialdar da jariialanbaǵan.
26 tamyzda basqarma «Azamattyq bastamalardy qoldaý ortalyǵy» KEAQ-qa mindettemeler oryndalmaǵandyqtan granttyq qarajatty qaitarý týraly hat joldady.
