Sý resýrstary jáne irrigatsiia ministri Nurjan Nurjigitov Qyzylorda oblysynyń Jalaǵash aýdanynda ótken «Dala kúni – 2025» kúrish orý naýqanynyń ashylý rásimine qatysty. Is-sharaǵa sondai-aq óńir basshysy Nurlybek Nálibaev ta qatysty,- dep habarlaidy Dalanews.kz
Jiynda aýyl sharýashylyǵy men sý salasynyń úzdik qyzmetkerleri marapattaldy. Barlyǵy 35 maman marapatqa ie boldy. Sonymen qatar aýyl sharýashylyǵy jármeńkesi uiymdastyrylyp, óńir diqandary óz ónimderin usyndy.
«Biyl vegetatsiia kezeńi kúrdeli aýa raiy jaǵdaiynda ótti. Soǵan qaramastan, sýdy ádil ári tiimdi bólý sharalarynyń nátijesinde Qyzylorda oblysyndaǵy kúrish alqaptaryn sýmen qamtamasyz ettik. Degenmen sý únemdeý tehnologiialaryna kóshý qajettiligi áli de ózekti. Memleket zamanaýi sýarý júielerin jyldam ári tiimdi engizý úshin barlyq qajetti qoldaý tetikterin, sonyń ishinde sýbsidiialardy usynyp otyr»,– dedi Sý resýrstary jáne irrigatsiia ministri Nurjan Nurjigitov.
2025 jylǵy vegetatsiia kezeńinde «Qazsýshar» RMK Qyzylorda filialy sýarmaly sýdy jetkizý boiynsha 1042 kelisimshart jasasty. Óńirde sýarýǵa alynǵan sý kólemi - 3,51 mlrd tekshe metr.
Egis alqaptaryn turaqty sýmen qamtamasyz etý úshin oblystaǵy «Qazsýshar» filialy men jergilikti sharýa qojalyqtarynyń kúshimen 357 sorǵy stantsiiasy ornatyldy. Onyń ishinde 60-y – filialdyń esebinen, qalǵan 297-si – jergilikti atqarýshy organdardyń, TJM-niń jáne diqandardyń sorǵy stantsiialary.
Sý resýrstary jáne irrigatsiia ministrliginiń arnaiy jumys toby sý sharýashylyǵy jaǵdaiyna, kanaldar men sý qoimalarynyń jai-kúiine, sýdyń bólinýine jáne sýarý kestesiniń saqtalýyna turaqty monitoring júrgizdi. Resýrstardy únemdeý maqsatynda kollektorlyq-drenajdy sýdy qaita paidalaný tásili qoldanyldy.
Sonymen qatar Qyzylorda oblysynyń diqandary sý únemdeý tehnologiialaryn belsendi qoldana bastady. Búgingi tańda aimaqtaǵy shamamen 75 myń gektar jer sý únemdeý júielerimen qamtylyp otyr. Júrgizilgen keshendi sharalardyń nátijesinde vegetatsiia kezeńiniń qalypty ótýine qajetti jaǵdai jasaldy.
