Qarjy monitoringi agenttigi tóraǵasynyń orynbasary Jeńis Elemesov Senat kýlýarynda jýrnalisterge bergen suhbatynda Nurlan Nyǵmatýllinniń uly Nurjan Nurlanovqa qatysty istiń qazirgi mártebesin túsindirdi, dep habarlaidy Dalanews.kz.
"Buǵan deiin Almaty qalasy boiynsha Ekonomikalyq tergeý departamenti qylmystyq isti tergep jatqan. Qazirgi tańda is halyqaralyq tergeý tapsyrmasynyń joldanýyna bailanysty ýaqytsha toqtatyldy. Ózgeris joq. Ázirge ol kýáger retinde ótip jatyr. Bizdiń suranystarymyzǵa jaýap kelgennen keiin ǵana mártebesi naqtylanady", — dedi agenttik ókili.
Eske salaiyq, buǵan deiin Májilistiń burynǵy tóraǵasy Nurlan Niǵmatýlinniń uly Nurjan Nurlanovqa qatysty qylmystyq is aiasynda halyqaralyq tergeý tapsyrmasy joldanǵany týraly jazǵan edik. Bul týraly Qarjylyq monitoring agenttigi tóraǵasynyń orynbasary Jeńis Elemesov málimdedi.
"Almaty qalasy boiynsha ekonomikalyq tergeý departamentinde reiderlik deregi boiynsha qylmystyq is bar. Qazir tergeý júrip jatyr. Osy is sheńberinde halyqaralyq tergeý tapsyrmasy joldandy. Qazirgi ýaqytta eshkimge kúdikti mártebesi berilgen joq. Birqatar mán-jailar anyqtalýy qajet. Nurlanovty biz kúdikti dep tanymaimyz, ol ázirge kýá retinde jaýap alýǵa jatady. Tergeý barysynda qosymsha faktiler anyqtalsa, quqyqtyq baǵa berilýi múmkin. Maǵan belgilisi – ol qazirgi ýaqytta elden tys jerde", – dedi Elemesov májilis kýlýarynda.
Nurjan Nurlanov 2019 jyldyń aqpanynan 2022 jylǵy Qańtar oqiǵalaryna deiin «QazMunaiGaz-Aero» JShS-niń bas direktory qyzmetin atqarǵan. Buǵan deiin, 2018 jyldyń qańtarynan bastap ol «Báiterek» ulttyq basqarýshy holdinginiń basqarma múshesi boldy. Sondai-aq, ol kvazimemlekettik sektorda birqatar mańyzdy laýazymdarda qyzmet atqarǵan.
Al Nurlan Niǵmatýlin 2022 jylǵy 1 aqpanda májilis tóraǵasy qyzmetinen ketken. Ol tómengi palata spikeri laýazymyn 2016 jyldan bastap atqaryp, buǵan deiin 2012–2014 jyldary da osy qyzmette bolǵan. Ár jyldary ol prezident ákimshiligin basqarǵan jáne Qaraǵandy oblysynyń ákimi bolǵan.
