قارجى مونيتورينگى اگەنتتىگى ءتوراعاسىنىڭ ورىنباسارى جەڭىس ەلەمەسوۆ سەنات كۋلۋارىندا جۋرناليستەرگە بەرگەن سۇحباتىندا نۇرلان ءنىعماتۋلليننىڭ ۇلى نۇرجان نۇرلانوۆقا قاتىستى ءىستىڭ قازىرگى مارتەبەسىن ءتۇسىندىردى، دەپ حابارلايدى Dalanews.kz.
"بۇعان دەيىن الماتى قالاسى بويىنشا ەكونوميكالىق تەرگەۋ دەپارتامەنتى قىلمىستىق ءىستى تەرگەپ جاتقان. قازىرگى تاڭدا ءىس حالىقارالىق تەرگەۋ تاپسىرماسىنىڭ جولدانۋىنا بايلانىستى ۋاقىتشا توقتاتىلدى. وزگەرىس جوق. ازىرگە ول كۋاگەر رەتىندە ءوتىپ جاتىر. ءبىزدىڭ سۇرانىستارىمىزعا جاۋاپ كەلگەننەن كەيىن عانا مارتەبەسى ناقتىلانادى"، — دەدى اگەنتتىك وكىلى.
ەسكە سالايىق، بۇعان دەيىن ءماجىلىستىڭ بۇرىنعى ءتوراعاسى نۇرلان ءنيعماتۋليننىڭ ۇلى نۇرجان نۇرلانوۆقا قاتىستى قىلمىستىق ءىس اياسىندا حالىقارالىق تەرگەۋ تاپسىرماسى جولدانعانى تۋرالى جازعان ەدىك. بۇل تۋرالى قارجىلىق مونيتورينگ اگەنتتىگى ءتوراعاسىنىڭ ورىنباسارى جەڭىس ەلەمەسوۆ مالىمدەدى.
"الماتى قالاسى بويىنشا ەكونوميكالىق تەرگەۋ دەپارتامەنتىندە رەيدەرلىك دەرەگى بويىنشا قىلمىستىق ءىس بار. ءقازىر تەرگەۋ ءجۇرىپ جاتىر. وسى ءىس شەڭبەرىندە حالىقارالىق تەرگەۋ تاپسىرماسى جولداندى. قازىرگى ۋاقىتتا ەشكىمگە كۇدىكتى مارتەبەسى بەرىلگەن جوق. ءبىرقاتار ءمان-جايلار انىقتالۋى قاجەت. نۇرلانوۆتى ءبىز كۇدىكتى دەپ تانىمايمىز، ول ازىرگە كۋا رەتىندە جاۋاپ الۋعا جاتادى. تەرگەۋ بارىسىندا قوسىمشا فاكتىلەر انىقتالسا، قۇقىقتىق باعا بەرىلۋى مۇمكىن. ماعان بەلگىلىسى – ول قازىرگى ۋاقىتتا ەلدەن تىس جەردە"، – دەدى ەلەمەسوۆ ءماجىلىس كۋلۋارىندا.
نۇرجان نۇرلانوۆ 2019 جىلدىڭ اقپانىنان 2022 جىلعى قاڭتار وقيعالارىنا دەيىن «قازمۇنايگاز-اەرو» ءجشس-نىڭ باس ديرەكتورى قىزمەتىن اتقارعان. بۇعان دەيىن، 2018 جىلدىڭ قاڭتارىنان باستاپ ول «بايتەرەك» ۇلتتىق باسقارۋشى حولدينگىنىڭ باسقارما مۇشەسى بولدى. سونداي-اق، ول كۆازيمەملەكەتتىك سەكتوردا ءبىرقاتار ماڭىزدى لاۋازىمداردا قىزمەت اتقارعان.
ال نۇرلان نيعماتۋلين 2022 جىلعى 1 اقپاندا ءماجىلىس ءتوراعاسى قىزمەتىنەن كەتكەن. ول تومەنگى پالاتا سپيكەرى لاۋازىمىن 2016 جىلدان باستاپ اتقارىپ، بۇعان دەيىن 2012–2014 جىلدارى دا وسى قىزمەتتە بولعان. ءار جىلدارى ول پرەزيدەنت اكىمشىلىگىن باسقارعان جانە قاراعاندى وبلىسىنىڭ اكىمى بولعان.
