Almaty oblysynyń Alataý qalalyq soty advokat erli-zaiyptylardy soqqyǵa jyqqany úshin koloniiada jazasyn ótep jatqan depýtat Dáýlet Turlyhanovtyń uly Nurasyl Bolattyń ótinishin qarady. Ol qalǵan jaza merzimin jeńilirek jaza túrine aýystyrýdy suraǵan, dep habarlaidy Dalanews.kz.
Isti qaraý barysynda prokýror men jábirlenýshi Anna Chernova da ótinishti ishinara qanaǵattandyryp, jazany bostandyqty shekteýge aýystyrýdy usyndy.
Alaida sot ótinishti qanaǵattandyrýdan bas tartty. Buǵan Nurasyl Bolattyń probatsiialyq baqylaý sharttaryn buryn birneshe ret buzǵany sebep boldy. Ol tún mezgilinde qoǵamdyq oryndarda júrgen, meiramhana men oiyn-saýyq ornyna barǵan.
"Ótinishte jáne oǵan tirkelgen materialdarda kórsetilgen málimetter sottalǵan N.Bolattyń minez-qulqyndaǵy oń ózgeristerdi dáleldemeidi, ol túzelgenin kórsetken joq. Sondyqtan jazany óteý jalǵasýy tiis", – delingen sottyń baspasóz qyzmeti taratqan habarlamada.
Sottyń qaýlysy zańdy kúshine engen joq.
Eske salaiyq, buǵan deiin depýtat Dáýlet Turlyhanovtyń uly Nurasyl Bolat jazasyn koloniiada óteitini týraly jazǵan edik.
Almaty qalalyq soty onyń apelliatsiialyq shaǵymyn qanaǵattandyrmady.
"Sot sheshimi ózgerissiz qaldy", - delingen habarlamada.
21 qazanda sot probatsiialyq rejimdi buzǵan Nurasyl Bolattyń bas bostandyǵyn shekteý jazasyn 1 jyl 5 aiǵa bas bostandyǵynan aiyrý jazasyna aýystyrǵan bolatyn.
Ol jazasynyń qalǵan merzimin – bir jarym jyldan az ýaqytty – qaýipsizdigi ortasha koloniiada ótkizedi.
Aita keteiik, buǵan deiin Almatyda áskeri qyzmetker belgili advokatty soqqyǵa jyqqany habarlanǵan. Bul oqiǵa 11 aqpanǵa qaraǵan túni Almatynyń saýda ortalyqtarynyń biriniń mańyndaǵy parkingte bolǵan. Is qoǵamdyq daý týdyrdy.
Bul oqiǵa týraly advokat Oleg Chernovtyń áieli Anna Dmitrievich Facebook-paraqshasynda jazǵan. Olar taksige otyra bergende bir jigit júgirip kelip, soqqyǵa jyǵylǵan qyzǵa kómektesýin suraǵan.
Al keiin advokatty soqqyǵa jyqqan áskeri qyzmetker grek-rim kúresinen qazaqstandyq jáne burynǵy Keńes Odaǵynyń palýany Dáýlet Turlyhanovtyń uly bolyp shyqty. Bul aqparatty Turlyhanovtyń ózi rastaǵan bolatyn. Ol ulyna qatysty daýǵa kózqarasyn bildirip, keshirim surady.
9 qazanda sot Nurasyl Bolatty ózine taǵylǵan qylmysty jasaǵany úshin kináli dep taýyp, 1 700 000 teńge kóleminde aiyppul saldy. 2024 jylǵy 14 mamyrda Joǵarǵy Sot isti kassatsiialyq tártipte qarap, úkimdi ózgertti. Turlyhanovtyń ulyna eki jyl bas bostandyǵynan shekteý jazasy taǵaiyndalyp, ótemaqy mólsheri ulǵaityldy.
