"Qazaqstan halqyna" qorynyń basqarma tóraiymy Lázzat Shyńǵysbaeva Qyzylordada ótken is-sharaǵa qymbat kiimmen, iaǵni 2,4 mln teńgelik Miu Miu pidjagy jáne baǵasy shamamen million teńge turatyn Fendi brendiniń shalbaryn kiip kelgen. Bul jait sirek aýrýlary bar balalardyń ata-analarynyń narazylyǵyn týdyrǵan, dep habarlaidy Dalanews.kz NewTimes.kz-ke siltep.
Ata-analardyń aitýynsha, qor 2022 jyldan beri tirkelmegen dári-dármekterdi satyp alýǵa qoldaý kórsetken. Alaida biyl mamyrda qarajat joqtyǵyn aityp, qarjyny basqa jobalarǵa baǵyttaǵan.
Diýshenniń bulshyqet distrofiiasyna shaldyqqan balalardyń ata-analary "Qazaqstan halqyna" qorynyń basshylyǵymen kezdesip, Elevidis, Kasimersen, Etiplersen, Golodirsen sekildi orfandyq preparattardy qamtamasyz etý máselesin talqylaýǵa tyrysqan. Olardyń iri memlekettik kompaniialarǵa tikelei júgingen talpynystary da nátije bermegen: olar qarjy tek osy qor arqyly bólinetinin aitqan.
Qazir basqarma tóraiymy qyzmetin Lázzat Shyńǵysbaeva atqaryp otyr. Ár óńirden ata-analar Astanaǵa kelip, onymen jeke kezdesýge niettengenimen, olardyń sózinshe, basshylyq ókilderi shyqpaǵan. Keiin olar áleýmettik jeliden onyń qymbat kiim kigen sýretterin kórgen.
"Ol Qyzylordaǵa bir is-sharaǵa barǵan. Árine, sóz sóileýge shyqqan bolýy kerek. Biraq ata-analar onyń brend kiimderin baiqap qalǵan: pidjak pen shalbar. Tek bir kiimniń quny million tursa, ailyǵyń qansha bolýy múmkin? Bul suraq týdyrady", - dedi "Ómirge sen" qoǵamdyq qorynyń negizin qalaýshy ári direktory Sabilia Shúgelova.
Brendtiń resmi saittaryndaǵy málimetke súiensek, Fendi brendiniń qara jibek shalbarynyń quny - 1300 fýnt sterling (shamamen 940 myń teńge), al Miu Miu pidjagynyń baǵasy qazirgi baǵam boiynsha 2,4 mln teńge turady.
Basylym osy jaitqa bailanysty "Qazaqstan halqyna" qorynyń baspasóz qyzmetine júgingen. Olar bul kiim "túrik óndirisiniń replikasy" ekenin aitypty.
