Ulytaý oblysy ákiminiń orynbasary jol erejesin buzyp, jurttyń ashýyn týǵyzdy, dep habarlaidy Dalanews.kz.
Áleýmettik jelide taraǵan beinejazbaǵa sáikes, Ulytaý oblysy ákiminiń orynbasary jóndeý jumystary endi ǵana aiaqtalǵan, áli tolyq qatpaǵan asfalt ústimen kóligimen emin-erkin júrip ótken. Turǵyndar joldyń jabyq ekenin eskertý úshin arnaiy belgiler qoiylǵanyna qaramastan, sheneýniktiń olardy elemei, jeke sharýasyn sheshýge asyqqanyn aitady.
Beinejazbany túsirip, jariialaǵan qala turǵyny Serik Dúisenulynyń aitýynsha, ákim orynbasarynyń áreketi jumysshylardyń eńbegine degen qurmetsizdik ári turǵyndarǵa teris úlgi boldy.
Jeli qoldanýshylary bul jaǵdaidy ótkir synǵa aldy.
«Eldegi tártipti saqtaýy tiis shendilerdiń ózi osylai jasasa, qarapaiym halyqtan ne kútemiz? Jumysshylar kún-tún demei, jol sapasyn jaqsartýǵa baryn salady. Al ákimniń orynbasary olardy elemei, jańa asfalttyń ústimen kólik aidaidy», – dep pikir qaldyrdy jeli qoldanýshylarynyń biri.
Jurtshylyq ókilderi bilik ókilderinen halyqqa úlgi bolarlyq áreket kútetinin, alaida bul jaǵdai kerisinshe senimdi shaiqaltyp, eldiń kóńilinde jaǵymsyz áser qaldyrǵanyn jetkizdi.
Ázirge ákimdik tarapynan resmi túsinikteme berilgen joq. Al qoǵam ókilderi sheneýniktiń áreketine quqyqtyq baǵa berilip, tiisti shara qoldanylýyn talap etýde.
