Qazaqstan qoǵamynda Úkimettiń jumysy synǵa jıi ushyraıtyny jańalyq emes. Bir jaǵynan, turǵyndar qosymsha qun salyǵynyń (QQS) kóterilýine narazy bolsa, ekinshi jaǵynan Prezıdent ekonomıkalyq bloktyń kreatıvti ıdeıa usynbaı, eski súrleýmen jumys istep jatqanyna syn aıtyp keledi. Bul týraly saıasattanýshy Talǵat Qalıev jazdy, dep habarlaıdy Dalanews.kz.
Degenmen, ádilettilik turǵysynan alǵanda, qazirgi Úkimet «ıdealdy daýyldyń» ortasynda qalyp otyrǵanyn moıyndaý kerek. Bir jaǵynan, iri ekonomıkalyq áriptesimiz Reseı men Batystyń sanksıalyq teketiresi tursa, ekinshi jaǵynan, ishki ınfraqurylymymyzdyń ábden tozyǵy jetken. Saıasattanýshy Talǵat Qalıevtiń aıtýynsha, búginde JEO pen strategıalyq mańyzy bar ózge de nysandardaǵy apattardyń jıileýi – burynǵy Úkimetterdiń jibergen olqylyqtarynyń jemisi.
«Qazirgi Úkimet osy burynǵy bılik tusynda sheshilmegen máselelerdiń saldarymen kúresýge májbúr. Jáne munyń barlyǵy búdjet tapshylyǵy jaǵdaıynda júzege asýda. Burynǵy jaıly kezeńde beıqamdyq tanytyp, ınfraqurylymdy jóndeýge jumsalmaǵan qarjyny qazirgi kabınet izdep, qıyndyqqa tap bolyp otyr», – deıdi Qalıev.
Foto: Ortalyq komýnıkasıalar qyzmetinen
Onyń pikirinshe, Úkimet keńesshileriniń quramy da osymen baılanysty bolýy múmkin. Óıtkeni, buryn keńesshi qyzmetine tájirıbesi joq, aty-jóni belgisiz nemese zeınet jasyndaǵy azamattar alynsa, qazirgi Premer-mınıstr keńesshileriniń qatarynda úsh birdeı burynǵy oblys ákimi – Eraly Toǵjanov, Ermek Marjyqpaev jáne Nurlan Uranhaev otyr.
«Eraly Toǵjanov pen Ermek Marjyqpaev kóktemgi sý tasqyny saldaryn joıý kezinde óńirlerge jıi sapar shegip, belsendiligimen este qaldy. Al Nurlan Uranhaevtyń qurylys máselelerin baqylaýǵa alǵany belgili. Arhıtektor mamandyǵy boıynsha bilimi bar bolǵandyqtan, Uranhaev bul salany basqalarǵa qaraǵanda jaqsy biletini sózsiz», – deıdi saıasattanýshy.
Al Ermek Marjyqpaevtyń mindeti kúrdeli ári jaýapkershiligi zor. Ol eldegi ınfraqurylymnyń jaǵdaıy men jylý maýsymyna daıyndyqty qadaǵalaıdy.
«Marjyqpaevtyń kezinde Aqmola oblysyn basqarǵanyn eskersek, bul saladaǵy túıtkilderdi jaqsy biledi. Sebebi Kókshetaýdaǵy JEO 90-jyldardan beri kúrdeli problemalardyń ortasynda tur. Jýyrda ol Ekibastuz, Rıdder sıaqty táýekeli joǵary óńirlerge arnaıy baryp, jaǵdaıdy jeke baqylaýyna aldy. Marjyqpaev ınfraqurylym máselelerin tek tehnıkalyq turǵydan emes, kadrlyq qamtamasyz etý jaǵynan da saralap, "ulttyq qaýipsizdik máselesi" dep baǵalady. Bul – óte durys ári dál baǵa», – deıdi Talǵat Qalıev.
Avtordyń pikirinshe, bul jaǵdaı Úkimettiń jaǵdaıdy tolyq baqylaýda ustap otyrǵanyn kórsetedi. Sondyqtan keńesshiler quramyndaǵy osyndaı kásibı mamandardyń bolýy mınıstrler men ákimderge de úlgi bolýy tıis.
«Árbir mınıstr men ákim osyndaı kásibı keńesshilerdiń pikirine qulaq asýy qajet. Kez kelgen jaǵdaıdan sabaq alyp, júıeli sheshim qabyldaý kerek. Almaty taýlarynda týrısiń qaıǵyly qaza tabýy sıaqty oqıǵalarda da osyndaı júıeli tásil qajet. Bul qaıǵyly jaǵdaılar qaıtalanbas úshin qateliktermen jumys júrgizilýi tıis», – dep túıindeıdi sarapshy.
