Nazarbaev ýniversiteti jataqhanasynan óli tabylǵan stýdent qyzdyń oqiǵasyna bailanysty ǵylym jáne joǵary bilim ministri Saiasat Nurbek túsinikteme berdi, dep habarlaidy Dalanews.kz.
Ministrdiń aitýynsha, bul oqiǵa boiynsha tergeý Qylmystyq kodekstiń 105-baby - "Óz-ózine qol jumsaýǵa deiin jetkizý" boiynsha júrgizilip jatyr.
"Qylmystyq-protsestik kodekske sáikes tergeý barysynda aqparat jariialanbaidy. Biz politsiiamen birlese jumys istep jatqanymyzdy ǵana rastai alamyz", - dedi Saiasat Nurbek.
Jýrnalister bul jaǵdai stýdentter arasyndaǵy janjaldyń saldary bolýy múmkin be dep suraǵanda, ministr naqty jaýap berýden bas tartty:
"Qosymsha aqparatty Politsiia departamenti beredi dep kelisilgen. Sondyqtan bul jóninde ázirge eshteńe aita almaimyz", - dep qysqa qaiyrdy ol.
Eske salaiyq, 18 maýsymda Nazarbaev ýniversitetiniń stýdenti jataqhanadan óli tabylǵan edi. Ýniversitet ákimshiligi marqumnyń otbasyna jáne jaqyndaryna kóńil aitty.
