نازاربايەۆ ۋنيۆەرسيتەتى جاتاقحاناسىنان ءولى تابىلعان ستۋدەنت قىزدىڭ وقيعاسىنا بايلانىستى عىلىم جانە جوعارى ءبىلىم ءمينيسترى ساياسات نۇربەك تۇسىنىكتەمە بەردى، دەپ حابارلايدى Dalanews.kz.
ءمينيستردىڭ ايتۋىنشا، بۇل وقيعا بويىنشا تەرگەۋ قىلمىستىق كودەكستىڭ 105-بابى - "وز-وزىنە قول جۇمساۋعا دەيىن جەتكىزۋ" بويىنشا جۇرگىزىلىپ جاتىر.
"قىلمىستىق-پروسەستىك كودەكسكە سايكەس تەرگەۋ بارىسىندا اقپارات جاريالانبايدى. ءبىز پوليسيامەن بىرلەسە جۇمىس ىستەپ جاتقانىمىزدى عانا راستاي الامىز"، - دەدى ساياسات نۇربەك.
جۋرناليستەر بۇل جاعداي ستۋدەنتتەر اراسىنداعى جانجالدىڭ سالدارى بولۋى مۇمكىن بە دەپ سۇراعاندا، مينيستر ناقتى جاۋاپ بەرۋدەن باس تارتتى:
"قوسىمشا اقپاراتتى پوليسيا دەپارتامەنتى بەرەدى دەپ كەلىسىلگەن. سوندىقتان بۇل جونىندە ازىرگە ەشتەڭە ايتا المايمىز"، - دەپ قىسقا قايىردى ول.
ەسكە سالايىق، 18 ماۋسىمدا نازاربايەۆ ۋنيۆەرسيتەتىنىڭ ستۋدەنتى جاتاقحانادان ءولى تابىلعان ەدى. ۋنيۆەرسيتەت اكىمشىلىگى مارقۇمنىڭ وتباسىنا جانە جاقىندارىنا كوڭىل ايتتى.
