Назарбаев университеті жатақханасынан өлі табылған студент қыздың оқиғасына байланысты ғылым және жоғары білім министрі Саясат Нұрбек түсініктеме берді, деп хабарлайды Dalanews.kz.
Министрдің айтуынша, бұл оқиға бойынша тергеу Қылмыстық кодекстің 105-бабы - "Өз-өзіне қол жұмсауға дейін жеткізу" бойынша жүргізіліп жатыр.
"Қылмыстық-процестік кодекске сәйкес тергеу барысында ақпарат жарияланбайды. Біз полициямен бірлесе жұмыс істеп жатқанымызды ғана растай аламыз", - деді Саясат Нұрбек.
Журналистер бұл жағдай студенттер арасындағы жанжалдың салдары болуы мүмкін бе деп сұрағанда, министр нақты жауап беруден бас тартты:
"Қосымша ақпаратты Полиция департаменті береді деп келісілген. Сондықтан бұл жөнінде әзірге ештеңе айта алмаймыз", - деп қысқа қайырды ол.
Еске салайық, 18 маусымда Назарбаев университетінің студенті жатақханадан өлі табылған еді. Университет әкімшілігі марқұмның отбасына және жақындарына көңіл айтты.
