Qazaqstan musylmandary dini basqarmasynyń ókilderi jol ústindegi mádeniet pen kólik júrgizýdegi jaýapkershilik týraly úndeý jasady, dep habarlaidy Dalanews.kz.
QMDB mamandary islam dini joldaǵy tártipke erekshe mán beretinin jetkizdi. Jol erejesin saqtaý – tek quqyqtyq mindet emes, shariǵatqa sai musylmandyq talap. Sebebi kólikti uqypsyz júrgizý, jyldamdyqty asyrý, baǵdarsham men belgilerge baǵynbaý – adamnyń ómirine qaýip tóndiretin, tipti kúnáli iske aparatyn áreket.
Múftiiat ókilderiniń sózinshe, kólikti basqarý – úlken amanat. Árbir júrgizýshi jolaýshynyń, jaiaý júrginshiniń jáne basqa kólik júrgizýshileriniń ómirine jaýapty. Sondyqtan jolda sabyr, sypaiylyq jáne musylmandyq mádeniet saqtalýy tiis.
Islamda adam ómiri – eń qasterli qundylyq. Quran men hadisterde beikúná janǵa ziian tigizýge qatań tyiym salynǵan. Jolda júrip, ózgege ziian keltirý nemese óz ómirin qaýipke tigý – musylman etikasyna qaishy.
Sonymen qatar din ókilderi kólik júrgizer aldynda Allany eske alyp, duǵa jasaýdyń mańyzyn eske saldy. Paiǵambarymyzdyń (oǵan Allanyń salaýaty men sálemi bolsyn) súnneti boiynsha, kólikke minerde «Bismillá» dep aitý, jolda sabyr saqtaý, qajet kezde duǵa etý – júristi de, júrekti de jeńildetedi.
QMDB jol ústindegi mádenietti jaqsartýǵa úles qosý – árbir musylmannyń boryshy ekenin atap ótti. Jol – jaqsylyq jasaýǵa múmkindik. Al tártip – iman men jaýapkershilik belgisi.
