Senator Bekbolat Orynbekov Qazaqstanda ataýly áleýmettik kómekti (AÁK) taǵaiyndaý barysynda oryn alyp jatqan zańbuzýshylyqtar týraly aitty, dep habarlaidy Dalanews.kz.
Onyń sózinshe, elde halyqty jumyspen qamtýǵa járdemdesý men áleýmettik kómekke bólinetin qarjy jyldan-jylǵa artyp keledi. Máselen, 2023 jyly bul maqsattarǵa 195 milliard teńge bólinse, 2024 jyly 208 milliard teńge qarastyrylǵan. Alaida senator atalǵan qarjynyń artýy árdaiym sapaly nátije bermeitinin alǵa tartty.
“Mysaly, 2022–2023 jyldary áleýmettik osal toptardyń kásipkerlik bastamalaryn qoldaýǵa berilgen granttardy alǵandardyń 45-ten astamy jumysyn toqtatty. Jastar praktikasy baǵdarlamasyna qatysqan 32 myń jastyń ishinde tek 3 500-i ǵana turaqty jumysqa ornalasqan. Bul baǵdarlamanyń tiimdiligi tómen ekenin kórsetedi. Dál osyndai jaǵdai “Kúmis jas” baǵdarlamasynda da baiqalady. Al ataýly áleýmettik kómek boiynsha júrgizilgen tekseris nátijesinde 615 otbasynyń 6-dan 12-ge deiingi jyljymaityn múlikke ie ekeni anyqtaldy. Sondai-aq 1 500 otbasynyń kommertsiialyq jyljymaityn múlki bar”, – dedi Orynbekov.
Óz kezeginde Eńbek jáne halyqty áleýmettik qorǵaý ministri Svetlana Jaqypova AÁK alýǵa úmitkerlerden bank qupiiasyna ruqsat alý tetigi engizilip jatqanyn jetkizdi. Onyń aitýynsha, bolashaqta barlyq otandyq bankter azamattardyń shyǵyny týraly málimetti Ulttyq banktiń tsifrlyq platformasyna beredi.
Ministrliktiń málimetinshe, biyl tsifrlandyrýdyń arqasynda memleket shamamen 40 milliard teńge únemdegen. Qazirgi tańda AÁK 228 myńnan astam adam alady. Byltyr osy kezeńde bul kórsetkish 330 myńnan asqan bolatyn.
