سەناتور بەكبولات ورىنبەكوۆ قازاقستاندا اتاۋلى الەۋمەتتىك كومەكتى (ااك) تاعايىنداۋ بارىسىندا ورىن الىپ جاتقان زاڭبۇزۋشىلىقتار تۋرالى ايتتى، دەپ حابارلايدى Dalanews.kz.
ونىڭ سوزىنشە، ەلدە حالىقتى جۇمىسپەن قامتۋعا جاردەمدەسۋ مەن الەۋمەتتىك كومەككە بولىنەتىن قارجى جىلدان-جىلعا ارتىپ كەلەدى. ماسەلەن، 2023 جىلى بۇل ماقساتتارعا 195 ميلليارد تەڭگە بولىنسە، 2024 جىلى 208 ميلليارد تەڭگە قاراستىرىلعان. الايدا سەناتور اتالعان قارجىنىڭ ارتۋى ءاردايىم ساپالى ناتيجە بەرمەيتىنىن العا تارتتى.
“مىسالى، 2022–2023 جىلدارى الەۋمەتتىك وسال توپتاردىڭ كاسىپكەرلىك باستامالارىن قولداۋعا بەرىلگەن گرانتتاردى العانداردىڭ 45-تەن استامى جۇمىسىن توقتاتتى. جاستار پراكتيكاسى باعدارلاماسىنا قاتىسقان 32 مىڭ جاستىڭ ىشىندە تەك 3 500ء-ى عانا تۇراقتى جۇمىسقا ورنالاسقان. بۇل باعدارلامانىڭ تيىمدىلىگى تومەن ەكەنىن كورسەتەدى. ءدال وسىنداي جاعداي “كۇمىس جاس” باعدارلاماسىندا دا بايقالادى. ال اتاۋلى الەۋمەتتىك كومەك بويىنشا جۇرگىزىلگەن تەكسەرىس ناتيجەسىندە 615 وتباسىنىڭ 6-دان 12-گە دەيىنگى جىلجىمايتىن مۇلىككە يە ەكەنى انىقتالدى. سونداي-اق 1 500 وتباسىنىڭ كوممەرسيالىق جىلجىمايتىن مۇلكى بار”، – دەدى ورىنبەكوۆ.
ءوز كەزەگىندە ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ااك الۋعا ۇمىتكەرلەردەن بانك قۇپياسىنا رۇقسات الۋ تەتىگى ەنگىزىلىپ جاتقانىن جەتكىزدى. ونىڭ ايتۋىنشا، بولاشاقتا بارلىق وتاندىق بانكتەر ازاماتتاردىڭ شىعىنى تۋرالى مالىمەتتى ۇلتتىق بانكتىڭ سيفرلىق پلاتفورماسىنا بەرەدى.
مينيسترلىكتىڭ مالىمەتىنشە، بيىل سيفرلاندىرۋدىڭ ارقاسىندا مەملەكەت شامامەن 40 ميلليارد تەڭگە ۇنەمدەگەن. قازىرگى تاڭدا ااك 228 مىڭنان استام ادام الادى. بىلتىر وسى كەزەڭدە بۇل كورسەتكىش 330 مىڭنان اسقان بولاتىن.
