Qazaqstan qoǵamynda Úkimettiń jumysy synǵa jii ushyraityny jańalyq emes. Bir jaǵynan, turǵyndar qosymsha qun salyǵynyń (QQS) kóterilýine narazy bolsa, ekinshi jaǵynan Prezident ekonomikalyq bloktyń kreativti ideia usynbai, eski súrleýmen jumys istep jatqanyna syn aityp keledi. Bul týraly saiasattanýshy Talǵat Qaliev jazdy, dep habarlaidy Dalanews.kz.
Degenmen, ádilettilik turǵysynan alǵanda, qazirgi Úkimet «idealdy daýyldyń» ortasynda qalyp otyrǵanyn moiyndaý kerek. Bir jaǵynan, iri ekonomikalyq áriptesimiz Resei men Batystyń sanktsiialyq teketiresi tursa, ekinshi jaǵynan, ishki infraqurylymymyzdyń ábden tozyǵy jetken. Saiasattanýshy Talǵat Qalievtiń aitýynsha, búginde JEO pen strategiialyq mańyzy bar ózge de nysandardaǵy apattardyń jiileýi – burynǵy Úkimetterdiń jibergen olqylyqtarynyń jemisi.
«Qazirgi Úkimet osy burynǵy bilik tusynda sheshilmegen máselelerdiń saldarymen kúresýge májbúr. Jáne munyń barlyǵy biýdjet tapshylyǵy jaǵdaiynda júzege asýda. Burynǵy jaily kezeńde beiqamdyq tanytyp, infraqurylymdy jóndeýge jumsalmaǵan qarjyny qazirgi kabinet izdep, qiyndyqqa tap bolyp otyr», – deidi Qaliev.
Onyń pikirinshe, Úkimet keńesshileriniń quramy da osymen bailanysty bolýy múmkin. Óitkeni, buryn keńesshi qyzmetine tájiribesi joq, aty-jóni belgisiz nemese zeinet jasyndaǵy azamattar alynsa, qazirgi Premer-ministr keńesshileriniń qatarynda úsh birdei burynǵy oblys ákimi – Eraly Toǵjanov, Ermek Marjyqpaev jáne Nurlan Uranhaev otyr.
«Eraly Toǵjanov pen Ermek Marjyqpaev kóktemgi sý tasqyny saldaryn joiý kezinde óńirlerge jii sapar shegip, belsendiligimen este qaldy. Al Nurlan Uranhaevtyń qurylys máselelerin baqylaýǵa alǵany belgili. Arhitektor mamandyǵy boiynsha bilimi bar bolǵandyqtan, Uranhaev bul salany basqalarǵa qaraǵanda jaqsy biletini sózsiz», – deidi saiasattanýshy.
Al Ermek Marjyqpaevtyń mindeti kúrdeli ári jaýapkershiligi zor. Ol eldegi infraqurylymnyń jaǵdaiy men jylý maýsymyna daiyndyqty qadaǵalaidy.
«Marjyqpaevtyń kezinde Aqmola oblysyn basqarǵanyn eskersek, bul saladaǵy túitkilderdi jaqsy biledi. Sebebi Kókshetaýdaǵy JEO 90-jyldardan beri kúrdeli problemalardyń ortasynda tur. Jýyrda ol Ekibastuz, Ridder siiaqty táýekeli joǵary óńirlerge arnaiy baryp, jaǵdaidy jeke baqylaýyna aldy. Marjyqpaev infraqurylym máselelerin tek tehnikalyq turǵydan emes, kadrlyq qamtamasyz etý jaǵynan da saralap, "ulttyq qaýipsizdik máselesi" dep baǵalady. Bul – óte durys ári dál baǵa», – deidi Talǵat Qaliev.
Avtordyń pikirinshe, bul jaǵdai Úkimettiń jaǵdaidy tolyq baqylaýda ustap otyrǵanyn kórsetedi. Sondyqtan keńesshiler quramyndaǵy osyndai kásibi mamandardyń bolýy ministrler men ákimderge de úlgi bolýy tiis.
«Árbir ministr men ákim osyndai kásibi keńesshilerdiń pikirine qulaq asýy qajet. Kez kelgen jaǵdaidan sabaq alyp, júieli sheshim qabyldaý kerek. Almaty taýlarynda týristiń qaiǵyly qaza tabýy siiaqty oqiǵalarda da osyndai júieli tásil qajet. Bul qaiǵyly jaǵdailar qaitalanbas úshin qateliktermen jumys júrgizilýi tiis», – dep túiindeidi sarapshy.
