Abaı oblysy ákimdigi 410 mıllıon teńgeden astam somaǵa josparlanǵan jıhaz satyp alý rásimin toqtatty,- dep habarlaıdy Dalanews.kz

Memlekettik satyp alý portalyna jarıalanǵan derekterge sáıkes, buǵan deıin jıhaz daıyndaýǵa arnalǵan tender jeti ret ótkizilgen. Alaıda, ákimdik ár joly ony joıýǵa májbúr bolǵan. Buǵan sebep – áleýetti jetkizýshilerdiń qujattarynyń talapqa saı bolmaýy. Osydan keıin satyp alýǵa qatysý sharttary qatańdatylyp, nátıjesinde sońǵy lot ta kúshin joıdy.

Ákimdik jańa jıhazdyń ne sebepti qajet ekenin de túsindirdi. Qazir memlekettik qyzmetkerler eski, tozyǵy jetken jıhazben jumys isteýge májbúr. Olardyń bir bóligi buryn Semeı qalasy ákimdiginiń balansynan esepten shyǵarylǵan, jaramsyz múlik bolsa, endi biri – qyzmetkerlerdiń óz úıinen ákelgen jıhazdar.

"Bul máseleni sheshý úshin memlekettik organ jıhaz jasaýdy uıǵarǵan. Jıhazdyń sapasy men oǵan qoıylǵan talaptarǵa qatysty syn aıtýǵa bolmaıdy, óıtkeni bári Qarjy mınıstrliginiń buıryǵyna sáıkes jasalǵan", – delingen ákimdik habarlamasynda.

Eske salaıyq, buǵan deıin qoǵamda oblys ákimdiginiń 410 mln teńgege jıhaz alýǵa qatysty jospary qyzý talqylanǵan edi.