Maqtaaral aýdanynda 5 eldi mekenge tabiǵi gaz berildi. Aýdan ákimi Baqyt Asanov aýyl turǵyndarynyń qýanyshymen bólisý úshin J.Nurlybaev aýyldyq okrýgine qarasty Ónimker aýylynda boldy,- dep habarlaidy Dalanews.kz
«Bul — úlken qýanysh pen mańyzdy tarihi sát. Tabiǵi gazdyń berilýi — eldi mekenderimizdiń infraqurylymyn damytý jolyndaǵy úlken qadam. Bul tek ómir sapasyn jaqsartyp qana qoimai, turǵyndarymyzdyń turmystyq jaǵdaiyn jeńildetýge, áleýmettik jáne ekonomikalyq damýǵa jol ashady. Memleket basshysynyń el halqyn sapaly ómir súrý múmkindigimen qamtamasyz etýge baǵyttalǵan tapsyrmalary men bastamalary nátijesinde, osyndai igi ister júzege asyp otyr» - dedi, Baqyt Nasyrhanuly.
Jiynda aýdan basshysy gazdyń jospardan erte qosylýyna atsalysqan «QazaqGaz Aimaq» AQ Túrkistan óńirlik filialynyń direktory Aqylbek Abildievqa alǵysyn aitty. Sondai-aq, aýyl turǵyndary gaz alaýynyń janǵanyna kýá bolyp, úlken qoshemetterin kórsetti. Turǵyndardyń rizashylyǵynda shek bolmady.
Gaz berilgen eldi mekenderdiń ishinde J.Nurlybaev aýyldyq okrýgine qarasty Yrysty, Qaraqyr, Ónimker eldi mekenderi jáne Jańajol aýyldyq okrýgine qarasty Araily, Dostyq eldi mekenderi bar.
Jalpy Maqtaaral aýdanynda 68 eldi mekenniń 46-y gaz júiesimen qamtylǵan, bul aýdandaǵy eldi mekenderdiń jalpy sanynyń 67,6% quraityn edi. Jańadan gaz qosylǵan eldi mekenderdiń esebinen bul kórsetkish jáne de artty.
Aita keteiik, 2024 jyly oblystyq jáne respýblikalyq biýdjetten jalpy 6,3 mlrd. teńge qarjy qaralyp, 19 eldi mekenniń ishki gaz júieleriniń qurylys jumystary júrgizilýde. Nysandardyń jalpy quny 8,2 mlrd. teńgeni quraidy, qurylys jumystary 2025 jylǵa ótpeli. Sondai-aq, qalǵan gazdandyrylmaǵan 4 eldi mekende ishki gaz júieleriniń qurylysyn bastaý úshin biyl 891,0 mln. teńge qarjy qaraldy.
Mine, osy jumystardyń arqasynda búgin 5 eldi mekenge gaz berilip otyr. Jalpy atalǵan qurylys jumystary tolyq aiaqtalǵannan soń 2026 jyly Maqtaaral aýdany 100% tabiǵi gazben qamtylatyn bolady.
