Qazirgi tańda Túrkistanda mádenıet pen ónerge aıryqsha kóńil bólinip keledi. Rýhanıatty damytýǵa arnalǵan tyń jobalar iske asýda. Respýblıkalyq, halyqaralyq deńgeıdegi sımpozıýmdar, óner festıvaldary ótip keledi. Sonyń biri Respýblıka kúnine oraı uıymdastyrylǵan halyqaralyq «Voice of Turan-2024» qazaq ánderin oryndaýshylar baıqaýy. Keshe oblys ákiminiń birinshi orynbasary Zulpyhar Joldasov festıvál qonaqtarymen kezdesip, Indonezıanyń Qazaqstandaǵy Tótenshe jáne ókiletti elshisi Mohamad Fadjrýl Rahmandy arnaıy qabyldady. Eki el arasyndaǵy týrısik baılanystardy nyǵaıtýǵa ýaǵdalasty, dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
– Túrki áleminiń rýhanı ortalyǵyna aınalǵan qasıetti Túrkistan qalasyna qosh keldińizder! Óner – ulttyń jany, rýhy, bar bitim-bolmysyn aıshyqtap turatyn erekshe qubylys. Búgin álemniń ár qıyrynan kelgen talantty jastardy qasıetti qalamyzda kórgenimizge qýanyshtymyz. Sonymen qatar ózińiz bastaǵan Indonezıa elshiligine qoldaýlaryńyz úshin alǵysymdy bildiremin. Baıqaý aldynda ózderińizben arnaıy jolyǵyp, izetimdi bildirýdi jón sanadym. Ózderińizben kezdesý barysynda da eki el arasyndaǵy mádenı-rýhanı baılanystardy damytý baǵytyndaǵy usynystaryńyzdy tyńdap, birlese jumys atqarýǵa daıyn ekenimizdi jetkizgim keledi. Túrkistan qalasyna saparlaryńyzdyń búgingi rýhanı sharamen baılanysty bolǵanyna shyn qýanyshtymyn. Aldaǵy ýaqytta da elder arasyndaǵy baılanystardy berik nyǵaıtyp, rýhanı-mádenı baǵytta birlese atqarar jobalarymyz mol bolady dep senemin, – degen Zulpyhar Sansyzbaıuly óńirdiń mádenı-týrıstik áleýetin tanystyrdy.
Turan daýysyn tamashalaýǵa kelgen Indonezıanyń Qazaqstandaǵy Tótenshe jáne ókiletti elshisi Mohamad Fadjrýl Rahman óz kezeginde jańarǵan Túrkistan qalasy týraly áserin jetkizdi. Indonezıa eli jaıly jan-jaqty maǵlumat berdi. Atalǵan memleketten qatysyp jatqan ındonezıalyq ánshi Tarrarınge sáttilik tiledi. Eki el arasyndaǵy baılanystyń nyshany retinde estelikke syı-sıapat tabystaldy.
Túrkistannyń tereń tarıhyna jáne jańa kelbetine qyzyǵýshylyq tanytyp keletin týrıser sany kún sanap artyp otyr. Olarǵa laıyqty qyzmet sapasyn arttyrý, tarıhı oryndarmen qatar, jańadan boı kótergen mádenı nysandardy rýhanı baǵyttaǵy sharalarǵa degen qoljetimdilikterin arttyrý maqsatynda óńirde júıeli jumystar qolǵa alynǵan.
- Aıta keteıik, qazaq ánderin álemdik deńgeıde nasıhattaýdy maqsat etken baıqaýdyń jyl saıyn aýqymy ulǵaıyp keledi. 2 ret onlaın rejımde uıymdastyrylǵan festıvál 5 jyldan beri halyqtyq merekege aınalyp úlgerdi. Bıylǵy baıqaýǵa 16 elden kelgen qatysýshylar «Kongres Hol» kesheninde eki kún boıy óz baqtaryn synamaq.
