Depýtat Ajar Saǵandyqova Tótenshe jaǵdaılar mınıstrliginiń jumysyn synǵa aldy, dep habarlaıdy Dalanews.kz.

Májáliste Shyńǵys Árinov vedomstvonyń jumysy men damý josparlaryna qatysty baıandama jasady.

Talqylaý barysynda depýtat Ajar Saǵandyqova mınıstrliktiń jumysyn “mınýs 5 balǵa” baǵalady. Ol munyń sebebi retinde adam ólimderi men qyzmetkerlerdiń qaza bolýy kezinde vedomstvonyń jetkilikti shara qoldanbaýyn atap ótti.

“Ár memlekettik organnyń jumysyna baǵa beremiz, búgin sizdiń mınıstrlikke de baǵa beremin. Alaıda, ádettegideı 0-den 5-ke deıin emes, mınýs 0-den mınýs 5-ke deıingi shkala boıynsha. Óıtkeni órt kezinde adamdar qaza taýyp, qyzmetkerlerińiz opat bolyp jatqanda, mınıstrliktiń jumysy nólde tur. Sizderdiń basty mindetterińiz – adamdardyń ómirin qorǵaý”, – dedi depýtat.

Mınıstr Shyńǵys Árinov synǵa jaýap retinde qyzmetkerlerdiń jumysynyń nátıjesi bar ekenin atap ótti. Ol mınıstrliktiń kóptegen túıtkilderine qaramastan, qyzmetkerler óz mindetterin tolyq kólemde atqaryp jatqanyn málimdedi.

“Mınýs 5 baldy qabyldaımyz. Biraq bul baǵa tek maǵan qatysty emes, barlyq qyzmetkerime áser etedi. Vıse-mınıstrden bastap qatardaǵy qyzmetkerge deıin barlyǵy kúni-túni jumys istep jatyr. Bul – olardyń adal qyzmetiniń nátıjesi”, – dedi mınıstr.

Oǵan jaýap retinde depýtat Saǵandyqova óz baǵasyn qyzmetkerlerge emes, mınıstrliktiń jalpy jumysyna bergenin atap ótti.

“Meniń baǵam sizdiń qyzmetkerlerińizge qatysty emes, olar batyrlar. Biraq Tótenshe jaǵdaılar mınıstrliginiń basty maqsaty – adamdardyń ómirin saqtap qalý, al ol maqsat tolyq oryndalmaı jatyr”, – dep túıindedi depýtat.