Tatarstanda qazaqtyń uly aqyny ári oishyly Abai Qunanbaevtyń eskertkish-biýsti ashyldy, - dep habarlaidy Dalanews.kz.
Tatarstan astanasynda qazaqtyń uly aqyny ári oishyly Abai Qunanbaevqa arnalǵan eskertkishtiń ashylý saltanaty ótti. Is-shara Qazaqstan Prezidentiniń 2024 jylǵy 22-24 qazan aralyǵynda ótip jatqan BRIKS memleket basshylarynyń XVI Sammitine qatysý úshin Qazan qalasyna jumys sapary aiasynda ótkizildi. Ashylý saltanatyna Qazaqstan Respýblikasynyń Mádeniet jáne aqparat ministri Aida Balaeva, Tatarstan Respýblikasynyń Mádeniet ministri Irada Aiýpova, Qazandaǵy QR Bas konsýly Erlan Ysqaqov, sondai-aq Tatarstan Jazýshylar odaǵynyń tóraǵasy Rkail Zaidýllin, sondai-aq qala turǵyndary men qazaq ulttyq-mádeni avtonomiiasynyń ókilderi qatysty. QR Mádeniet jáne aqparat ministri Aida Balaeva Qazanda eskertkishtiń ashylýyn halyqtar arasyndaǵy dostyqtyń, ózara túsinistik pen rýhani týystyqtyń úlgisi ekenin aitty.
«Búgingi is-sharanyń BRIKS memleketteri yntymaqtastyǵy sammiti aiasynda ótip jatqanynyń ózi is-sharaǵa erekshe sipat berip tur. Bul eki el arasyndaǵy mádeni bailanysty nyǵaityp, tereńdete túseri sózsiz. Abai – óz ultynyń rýhani bailyǵyn boiyna sińire otyryp, jalpy adamzattyq oi-pikir deńgeiine kóterilgen tulǵa. Bizdiń halyqtar arasyndaǵy ózara mádeni qundylyǵymyz artyp, dostyǵymyz nyǵaia bersin», – dedi Aida Balaeva.
Uly oishyldyń eskertkishi Qazan qalasynda Nazarbaev pen Kachalov kósheleriniń qiylysynda ornatyldy. Biýst avtory – Qazaqstan Respýblikasy Sýretshiler odaǵynyń múshesi, músinshi Nurbol Qaliev.
«Qazaqstannyń Reseimen dostyq qatynasyn damytý aiasynda Tatarstanǵa, bizdiń mádenietimizge shynaiy qyzyǵýshylyq tanytyp jatqany qýantady. 2018 jyly Qazaqstan tarapynan Qazan qalasyna qonaqjailyq belgisi – «Taiqazan» músini syiǵa berildi. Búgin Abaidyń eskertkishi de dál osy jerde, osy alańda ornatylýy kezdeisoq emes. Reseide uly qazaq aqynyna degen qurmet erekshe. Elimizdiń astanasynda Abaidyń eskertkishi ornatylǵan. Sondai-aq Reseidiń birqatar qalalarynda Abai Qunanbaiulynyń atymen atalǵan kósheler bar. Búgingi is-shara – qazaq pen tatar halyqtarynyń rýhani birligine negizdelgen uzaq jyldar boiǵy jemisti iskerlik pen mádeni bailanystardyń nátijesi dep bilemiz», – dedi Tatarstan Respýblikasynyń Mádeniet ministri Irada Aiýpova.
