Respýblika kúnine orai uiymdastyrylǵan merekelik sharada aimaq basshysy Ermek Kósherbaev Qazaqstannyń berik basqarý júiesi, turaqty ekonomikasy men belsendi syrtqy saiasaty qalyptasqan memleket retinde damyp kele jatqanyn erekshe atap ótti.
– Sońǵy bes jylda elimizde saiasi júieni túbegeili ózgertý arqyly aýqymdy reformalar júrgizildi. Azamattardyń qoǵamdyq sanasy jańǵyryp, quqyqtyq mádeniet deńgeii artty. Jańa minez-qulyq úlgileri qalyptasyp, qundylyqtar ornyǵýda, - dedi oblys ákimi.
Sondai-aq Ermek Kósherbaev óńirde úkimet ashyqtyǵy men azamattyq qoǵam institýttarymen seriktestik nazardan tys qalmaǵanyn aitady. Áleýmettik mańyzy bar máselelerdi sheshý qoǵamdyq áleýetti mobilitsaziialaý men resýrstardy kezeń-kezeńimen paidalanýdy talap etedi.
Asa mańyzdy jobalardyń biri – Ortalyq Aziiadaǵy eń uzyn ótkel sanalatyn Buqtyrma sý qoimasy arqyly ótetin kópirdiń ashylýy.
– Bul kópir jeti aýdandy biriktirdi. Ol elimizdiń tranzittik áleýetin nyǵaityp, óńir damýyna úles qosady, - dedi Ermek Kósherbaev.
Sondai-aq qarasha aiynda titan qojyn shyǵaratyn zaýyt qurylysy boiynsha «IREL Limited» úndilik kompaniiasymen kelisimshartqa qol qoiylmaq. Bul qazaqstandyq titannyń álemdik naryqtaǵy básekege qabilettiligin arttyrady.
– Respýblikanyń barlyq jetistikteri – tutas qoǵamnyń birligi men ereń eńbeginiń jemisi, – dep atap ótti aimaq basshysy.
Jiyn sońynda ol joǵary jetistikterge umtylýdyń qanshalyqty mańyzdy ekenin aityp, qazaqstandyqtarǵa jyly lebizin bildirdi.
