Bólshek saýdadaǵy Qazaqstan halqynyń dollarǵa degen suranysy sońǵy alty aida eń joǵary shekti igerdi. Bul týraly ekonomist Ǵalymjan Aitqazin Telegram arnasynda jazdy, dep habarlaidy Dalanews.kz.
"Ulttyq bank usynǵan derekterge súiensek, 2024 jylǵy qyrkúiekte AQSh dollarynyń taza saýda-sattyq kólemi nemese aqsha aiyrbas oryndarynda satylǵan kólemi 353 mln dollardy nemese 170 mlrd teńgeni qurady. Al bul kólem ótken tamyzda 231 mln dollar bolǵan edi. Demek, bir aida suranys 52,8%-ǵa ósti, al ótken jyldyń osyndai kezeńimen salystyrǵanda 42,3%-ǵa joǵary", - deidi ol.
Qyrkúiek aiynda Qazaqstan óńirleri boiynsha bólshek saýdadaǵy dollarǵa degen eń úlken suranys Shymkent (31%), Almaty (27%), SQO (7%) jáne Astana (6%) turǵyndarynyń úlesine tiesili.
2024 jylǵy qańtar-qyrkúiek ailarynda shetel valiýtasyna degen suranys 2,9 mlrd dollardy qurap, bir jylǵy kórsetkishten 17,2%-ǵa artyq boldy. Sondai-aq qyrkúiek aiynda halyq tarapynan evro boiynsha netto-suranystyń kúrt ósýi baiqalady: 3 mlrd teńgege, al bul kórsetkish tamyz aiynda ǵana 1,3 mlrd teńge bolatyn, demek bir aida 2,4 ese ósim tirkelip otyr.
"Aiyrbas baǵamynynyń ekinshi jartyjyldyqta joǵary mánde uzaq saqtalýy halyqtyń dollarǵa degen suranysynyń qalpyna kelýine áser etti. Mysaly, osy jyldyń birinshi jartysynda teńgeniń birtindep nyǵaiǵanyn baiqadyq, bul kópshilik tarapynan dollardy taza satyp alýlar deńgeiiniń tómendeýine alyp kelgen edi", - dep atap ótedi ekonomist.
Buǵan deiin Qazaqstan azamattary sońǵy tórt jylda altyn quimasyna kóbirek investitsiia jasai bastaǵynyn jazǵan bolatynbyz.
