Almaty qalasynyń Óńirlik komýnıkasıalar qyzmetinde ótken brıfıńte Polısıa departamentiniń resmı ókili Saltanat Ázirbek jol apaty statısıkasynan derekter keltirip, joldardaǵy qaýipsizdikti arttyrýǵa baǵyttalǵan sharalar týraly aıtty,- dep habarlaıdy Dalanews.kz.
Onyń aıtýynsha, jyl basynan beri Almatyda 3 869 jol-apaty tirkelgen, sonyń saldarynan 4 211 adam zardap shekken.
Apattardyń negizgi sebebi qalanyń kólik quraldarynyń kóptigi: búgingi kúni Almatyda 650 889 avtomobıl tirkelgen, al kún saıyn megapolıske óńirlerden 550 000-ǵa deıin kólik kiredi.
Mopedter men elektr skýterler sıaqty balamaly kólik túrlerine qatysy jol apatynyń artýyna erekshe nazar aýdaryldy.
Polısıanyń málimetinshe, mopedterge qatysty 743 JKO bolyp, 757 adam zardap shegip, 14 adam qaza tapty.
Elektr skýterlerine qatysty 103 JKO tirkeldi, sonyń saldarynan 109 adam jaraqat aldy; qaza tapqandar joq.
Motosıklderge qatysty 19 apat tirkelip, 19 adam zardap shegip, 2 adam qaza tapty.
Saltanat Ázirbek Almaty kóshelerinde mopedshiler men skýterlerdi paıdalanýshylardy baqylaýdy kúsheıtý úshin kún saıyn reıdter júrgizetin 8 motosıkl ekıpajy patrúldeıtinin atap ótti. Jyl basynan beri 31 894 moped júrgizýshisi jáne 28 762 skýter paıdalanýshysy ákimshilik jaýapkershilikke tartyldy. Sonymen qatar, kámeletke tolmaǵandardy mopedter men skýterler júrgizýge ruqsat etkeni úshin 113 ata-anaǵa qatysty sharalar qabyldandy.
"Jyl basynan beri barlyǵy 3 420 483 ret jol qozǵalysy erejelerin buzylǵan. Mas kúıinde kólik quraldaryn basqarǵany úshin 1 890 júrgizýshi ustaldy, 2 846 adam júrgizýshi kýáliginen aıyryldy, al 6 000-nan astam kólik quraly, onyń ishinde 1 700 moped arnaıy turaqqa qoıyldy", - dep qorytyndylady Almaty PD ókili.
Aıta keteıik, 3 qazanda Qazaqstan Respýblıkasynyń Prezıdenti Qasym-Jomart Toqaev moped ıelerin júrgizýshi kýáligin alýǵa jáne kólik quraldaryn tirkeýge mindetteıtin zańǵa qol qoıdy. Bul sharalar jol qozǵalysy qaýipsizdigin arttyrýǵa jáne mopedterdiń qatysýymen bolǵan JKO sanyn azaıtýǵa baǵyttalǵan.
Tirkelý úshin moped ıelerine myna qujattardy usyný kerek:
- Jeke basty kýálandyratyn qujat (nemese sıfrlyq qujattar servısi arqyly elektrondyq nysanda);
- Salyq kodeksiniń 553 jáne 615-baptarynda kózdelgen KQTK jáne MTNB bergeni úshin tirkeý alymy men memlekettik bajdardyń tólengenin rastaıtyn qujattar;
- Eger bar bolsa, tehnıkalyq qujat nemese ashyq kózderden alynǵan mopedtiń tehnıkalyq sıpattamalary týraly málimetter;
- Menshik ıesiniń ótinishi;
- Kólik quralyn tekserý aktisi.
Moped ramasynyń nómiri bolmaǵan jaǵdaıda, sáıkestendirý nómirin tirkeýge deıin moped ıesiniń ótinishi boıynsha ýákiletti organ beredi.
