Alash ziialylary týraly filmder túsirip júrgen rejisser Murat Esjan men prodiýser Aisáýle Ábilda áleýmettik jelide nege shetelge kóship ketkenin aitty, - dep habarlaidy Dalanews.kz.
"Abai joly", "Ahmet. Ult ustazy", "Mirjaqyp. Oian, qazaq!" sekildi kesek týyndylar túsirgen avtorlar qazir Malaiziiada turyp jatyr.
"Birinshiden, biz jańa jobamyzǵa bar yntamyzdy arnai alatyndai shyǵarmashylyq kúi izdep keldik. Elde úiimiz ben ofisymyzdyń arasy qatty alys bolmasa da, kádimgidei ýaqytymyzdy alatyn. Keptelis, baratyn basqa da sharalar, toi, shaqyrys bar, sonymen ýaqyttyń qalai ótkenin bilmei qalyp júrdik. Al bizdiń jumys ondai erkelikti kótermeidi, sebebi dedlain degen dáý bar, iaǵni seriktesińmen kelisken ýaqytta sharýa bitý kerek, áitpese kez kelgen isti ǵasyrlap istei berýge bolady. Sharýanyń ýaqytyly bitip, jumystyń jaqsy júrýine eń jaýapty tulǵa - prodiýser bolǵandyqtan, men bul máseleni barynsha qolaily sheshýge tyrystym. Árine, kóshe qalsań, isiń bite qoiady degen sóz emes, bastysy niet jáne tyrysý, qalǵanyn nátijeden kútý", - dedi Aisáýle Ábilda.
Prodiýserdiń sózinshe, kóshýge ekinshi sebep - ózderiniń úi men ofisti jaldap júrýi, balalardyń aqyly mektepte oqýy.
"Ekinshiden, elde biz onsyz da úi men ofis jaldap, balalarymyzdy aqyly mektepte oqytyp júrdik. Árine, oqý aqysyna 100%, 70% grant alǵannyń ózinde tamaǵy men tasymaldaýyn ǵana tóleýge ár balaǵa kádimgidei qarajat ketetin, oǵan qosa jyl saiyn qysqy daiyndyq bar, onyń da óz shyǵyny jeterlik, sonyń bárin eseptei kele dál sondai tólemge qai memleketterde jaqsyraq jaǵdaida jumys istep, balalarymyzǵa qosymsha til úiretetindei múmkindikter bar dep zerttedik. Malaiziiada orta bilim júiesiniń jaqsy damyǵany men balalarǵa aǵylshyn, qytai tilderin meńgerip shyǵýǵa jaily ortanyń bolýy da sheshimimizge áser etti.
Úshinshiden, jańa elde turyp kórý - kókjiegińdi kádimgidei keńeitip jiberedi ǵoi, sony da eskerip,
jumys pen ómirdiń, bala-shaǵany jetkizýdiń arasynda óz damýymyzǵa da dem bereiik degen oimen ýaqytsha Malaiziiaǵa kóshtik", - dedi ol.
Aisáýle Ábilda jańa jobaǵa orai kópshilikten qoldaý surady.
"Qazirgi mendegi basty tilek - osy jobanyń sátti júrip ketýi jáne aman-esen kórermenmen qaýyshýy bolyp tur. Ózderińiz biletindei, bizdiń kompaniiamyzda turaqty jumys isteitin - eki adam ǵana bar, sol jalǵyz áriptesimniń stsenariii jaqsy shyqsa eken dep ýaiymdap júrmin. Artyq sekýndyńyz bolsa, sizder de bizdi duǵalaryńyzǵa qosyp, tileýles bola júrińizder",- dedi joba prodiýseri.
