Májilis depýtaty Oljas Quspekov premer-mınıstrdiń orynbasary - ulttyq ekonomıka mınıstri Serik Jumanǵarınge joldaǵan saýalynda kólikterdiń aldyńǵy búıir áınekterin aqyly boıaýdy zańdastyrý máselesin kóterdi, – dep habarlaıdy Dalanews.kz.
Depýtat budan búdjettiń de upaıy túgendeletinin aıtty. Ulttyq statısıka búrosynyń resmı málimetteri boıynsha 2025 jylǵy 1 mamyrǵa deıin elimizde 6 mln 176 myń kólik tirkelgen, onyń 86,5%-y - jeńil kólik.
"Avtoparktiń 5%-i qamtylǵan jáne ruqsattyń ortasha quny 50 AEK bolsa da, búdjetke túsetin túsim kólemi jylyna 50 mlrd teńgeden asýy múmkin. Bul qarajat ınfraqurylymdy qalpyna keltirýge jáne damytýǵa, tasjoldardy jóndeýge jáne ustaýǵa paıdalanylýy múmkin", - dedi ol.
Al Keden odaǵynyń "Dońǵalaqty kólik quraldarynyń qaýipsizdigi týraly" tehnıkalyq reglamentine sáıkes kem degende 70% jaryq ótkizgen jaǵdaıda aldyńǵy búıir áınekterde tonırovka qoldanýǵa ruqsat etiledi.
"Bul talaptar tonırovkany zańdastyrýdyń ulttyq tásiliniń negizin qalaýy kerek. Aqyly memlekettik qyzmetterdi paıdalanýdyń tabysty tájirıbesi bar. Máselen 2024 jyly búdjet VIP-memlekettik nómirlerdi satýdan 15,8 mlrd teńge tapty, bul osyndaı sheshimderdiń tıimdiligin rastaıdy", - dedi Oljas Quspekov.
Depýtat álemdik tájirıbeni de mysal retinde keltirdi.
"Halyqaralyq tájirıbe zańdastyrylǵan aqyly tonırovkanyń tıimdiligin rastaıdy. Máselen Qyrǵyz Respýblıkasynda tonırovkaǵa ruqsat berýden 2024 jyly búdjetke shamamen 4 mlrd teńge tústi. Ózbekstanda jaryq ótkizýge ruqsat 70%-dan bastap beriledi. BAÁ men Ońtústik Koreıada tehnıkalyq talaptar men baj salyǵyn tóleý kezinde aldyńǵy áınekterdi 50% jáne 40% deıin boıaýǵa ruqsat etiledi", - dedi ol.
Oljas Quspekov Úkimetke mynadaı usynys joldap otyr:
"Ýákiletti organdarǵa ruqsattardy resimdep, búdjetke paıda túsirý úshin kem degende 70% jaryq ótkizgen jaǵdaıda kólikterdiń aldyńǵy búıir áınegin aqyly boıaýdy zańdastyrý tetigin ázirleý kerek".
